Illersornissamut ministeri: Umiarsuit ajutooqqasut iluarsiivigineqarnissaat pingaartinnerpaavarput
Issittumi Sakkutooqarfiup umiarsui marluk ajoquteqarput, pitsaanerpaamik ingerlasinnaajunnaarlutik. Umiarsuit sapinngisamik pingaarnerpaatinneqarput, danskit illersornissamut ministeriat erseqqissaavoq, upernaallu ingerlanerani aaqqiissutissamik nassaarnissani naatsorsuutigaa.
Siullermik umiarsuarnik alapernaarsuiartortitat qamutilittai atorsinnaajunnaarput, maannalu aamma umiarsuarnik alapernaarsuiartortitat pitsaanerpaamik ingerlasinnaannginnerat paasinarsivoq.
Issittumi Sakkutooqarfiup umiarsuaatai marluk alapernaarsuutit mootoriminnik ajoquteqarnerat pissutigalugu angalasinnaanngillat. Umiarsuit taakku pisoqaavallaanngikkaluarlutik Issittumi Sakkutooqarfimmik ajornartorsiortitsisimapput, aamma Kalaallit Nunaanni oqartussaassutsimik atuutsitsinermut unammillernartuusimapput.
Illersornissamut ministeri Troels Lund Poulsen (V), ulluni makkunani Kalaallit Nunaanniittoq, aaqqiissutissamik sulissutiginnittoqartoq Sermitsiaq.AG-mut ilisimatitsivoq.
- Maanna umiarsuaq Savalimmiuneersoq Kalaallit Nunaannut tulaapparput, umiarsuit marluk maannakkut atorsinnaannginnerisa kinguneri annikillisinniarlugit. Aasalli tungaanut immami annertunerusumik suliaqartoqarnissaa ersarippoq. Taamaattumik pingaaruteqarpoq ajornartorsiut piaarnerpaamik aaqqinnissaa, danskit illersornissamut ministeriat Troels Lund Poulsen, Sermitsiaq.AG-mut oqarpoq.
Aaqqiissutissaq upernaaru pinissaa neriuutaavoq
Issittumi Sakkutooqarfiup umiarsuarnik atortussanik amigaateqarnera Kalaallit Nunaanni qaqugu aaqqinneqarsinnaassanersoq Troels Lund Poulsenip maanna oqaatigisinnaanngilaa. Kalaallit Nunaanni angallarissunik ingerlalluartunillu umiarsuaqarnissap "pingaartinneqarnerpaanissaa" pisariaqartoq oqarpoq.
- Uanga isumaga naapertorlugu qaammatit arlallit atorlugit tamanna suliarisinnaanngilarput. Neriuutigigaluarparput marsip qaammataa imaluunniit kingusinnerpaamik apriilimi umiarsuarnik atorsinnaasunik peqalersinnaalissalluta, Troels Lund Poulsen oqarpoq nangillunilu:
- Kisianni qaqugu tamanna pissanersoq nammineq aalajangersinnaannginnakku erseqqissumik akissuteqarsinnaanngilanga. Oqaannarsinnaavunga tamanna immikkut pingaartinneqartariaqartoq, aamma umiarsuit aallarteqqinnissaannut aningaasaliisoqassappat aningaasatigut tunngavissaqarluarnissaq pisariaqartoq, oqarpoq.