sakkutooqarneq
Illersornissamut ministerip qulimiguullit isornartorniorneqarsimaqisut illersorpai
Illersornissaqarfiup qulimiguuliutai nutaat imaani puttasinnaanngillat. Illersornissaaqarfiup qulimiguuliutaanni nutaani puttasinnaanngitsuni annanniutit isumanaallisaanermik annertusisaasspput. Ilisimasallit kisianni isornartorsiuipput. KNR taama oqaluttuarpoq.
Illersornissaqarfiup qulimiguulii nutaat MS60R Seahawkit imaani puttasinnaanngillat. Tamannalu Issittumi sulinermi assut aarlerinartoqarpoq. KNR taama allappoq.
Sakkutuut imarsiortut qulimiguuliini aqutsisuni tullersortaasimasoq ukiut pingasut matuma siorna pensionersimasoq, Stanley Sørensen taama oqarpoq.
- Isumaqarpunga tamanna isornartoqartoq, qulimiguullimmi taama ittut sumiiffinni imaanilu ulorianartuni nunami isorartoqisumi atorneqartussaapput. Imaq nilleqaaq, silalu ajortarluni. Taama ittuniitilluni qulimiguulimmik ajornartorsiorluni mittariaqalersilluni annannissamut periarfissaqarpallaanngilaq, qulimiguulimmi taanna ingerlaannaq kivisinnaavoq pusissinnaallunilu, Stanley Sørensen oqarpoq.
Folketingimi isumasioqatigiinnermi illersornissamut ministerip Claus Hjortip nassuiarpaa, Illersornissaqarfiup nammineersluni Seahawk taamaattoq innersuussimagaa - tamannalu isumannaatsuuvoq, ministeri KNR naapertorlugu taama isumaqarpoq.
Atuaruk: Seahawksit qulingiluat Lynx’inik paarlaassapput
Ministeri naapertorlugu qulimiguullip isumannaassusaa suli qaffasippoq, qulimiguullimmi isumannaallisaatinik immikkut ikkussuiffigineqarsimapput.
Tamakkuli Stanley Sørensenip aaqqiissutitut isiginngilai. Inuttat ilinniarluarsimasuupput. Immap iluani annaassiniarsinnaasutut sungiusarneqartarput. Ilaasutulli angalasuusinnaasut isumannarnerupput, taanna KNR-imut naliliivoq.
Naalagaaffik katillugu Seahawkinik qulingiluanik 4 milliardit koruuninit missaanik nalilinnik pisivoq, taakku tulleriaarlutik 2018-imi aasap tungaanut tunniussuunneqassapput.