Illersornissaqarfiup paasissutissaatai siammarterneqarsimasut: - Kalaallit Nunaat sakkulersorfiunngitsutut nangittumik inissisimassaaq
Taamak oqarpoq naalagaaffinngornissamut nunanullu allanut naalakkersuisoq, illersornissaqarfiup milliartilikkaanik Kalaallit Nunaanni aningaasanik pilersaaruteqarnera pillugu. Taanna innersuussivoq illersornissaqarfiup missingiusiarisimasaa Nunatsinni Danmarkimilu politikkikkut suliarineqaranilu akuerineqarsimanngitsoq.
Vivian Motzfeldt (S) erseqqissaavoq, illersornissaqarfiup paasissutissaatai siammarterneqarsimasut, illersornissaqarfiullu aningaasaliissutissatut kissaataanik imaqartut missingiutaannaasut, taamaammallu Naalakkersuisunit aammalu danskit naalakkersuisuinit suliarineqaratillu akuersissutigineqarsimanngitsut:
- Paasissutissat siammarneqarsimasut immikkuualuttortai isummersorfigisinnaanngilakka aamma isummersorfigerusunngilakka. Siammarneqarsimasummi taakku Kalaallit Nunatsinni Danmarkimilu politikkikkut oqaluuserineqarnikuunatillu aalajangersaaffigineqarnikuunngillat. Taamaattorli paasissutissat siammarterneqarnerisa kingorna Naalakkersuisunit danskit Naalakkersuisui qanimut attaveqaqatigaagut, qularnaatsumillu naqissuserneqarpoq erseqqissaatigineqarlunilu illersornissaqarfiup missingiutai taakku naalakkersuinikkut suli suliarineqanngitsut, taamaammat illersornissaqarfik pillugu isumaqatigiissutissaq pillugu piareersarnerit nanginneqarput, pilersaarutillu malillugit isumaqatigiinniarnerit ukiup nutaap aallartilaarnerani aallartinneqartussaapput.
Vivian Motzfeldt tassunga tunngatillugu erseqqissaavoq, nammineq illersornissamullu ministeri qanimut attaveqaqatigiillutik, aammalu naatsorsuutiginninnerarpoq qanimut oqaloqatigiinneq taanna aqqutigalugu ineriartorneq nutaaq, danskit naalakkersuisuisa illersornissamut aningaasaliinerisa malitsigisai pillugit suleqatigiinnertik ingerlanneqarumaartoq, aammalu naatsorsuutiginninnerarpoq Danmark, Nunatta Danmarkillu akornanni isumaqatigiissutit malillugit suliassani nunarput pineqartillugu, isumannaarinnittuassasoq, Kalaallit Nunarput naligisatut peqataassasoq.
Isumaqatigiinniarnermut tunngavissat aallartisinneqarput
Taamaattorli paasissutissat siammarneqarsimasut aallaavigalugit Naalakkersuisut aammalu danskit naalakkersuisui Kalaallit Nunatta Danmarkillu akornanni suleqatigiinnerup patajaassusaa pillugu oqaloqatigiinnerannik kinguneqarsimavoq. Tassunga tunngatillugu Vivian Motsfeldt erseqqissaavoq tatigeqatigiilluni suleqatigiinneq innarlerneqanngitsoq, aamma illersornissaqarfiup paasissutissaatai anillaanneqarsimasut ersersitsigaluartut Kalaallit Nunaata sakkussakillisaaffigineqarnissaanik Naalakkersuisut piumasaqaataannut naapertuutinngitsut arlaqaraluartut.
- Paasissutissat anillaanneqarsimasut saqqummernerisa kingorna, danskit naalakkersuisuisa Naalakkersuisunut saqqummiuppaat illersornissaq pillugu isumaqatigiinniutissat immikkoortuisa siulliannut tunngatillugu missingiut, taannalu Naalakkersuisunut agguaanneqarpoq 22. novemberimi, taamaammat Naalakkersuisuisunit missingiut taanna aallaavigalugu immikkuualuttut pillugit oqaaseqarsinnaanngilagut aamma innersuussutigissavara isumaqatigiinniarnerit aallartitassagut sillimaniarneq pillugu annertoorujussuarmik nipangiussisussaatitaanermik aallaaveqarmata, taamatuttaaq isumaqatigiinniarnerusussaammata allannguinernik nassataqarsinnaasut, Vivian Motzfeldt Sermitsiaq.AG-mut oqarpoq.
Taamaattorli aamma naalagaaffinngornissamut nunanullu allanut Naalakkersuisoq, Vivian Motzfeldt erseqqissaavoq, danskit naalakkersuisuisa Naalakkersuisullu akornanni isumaqatigiissutaasimasoq illersornissaq pillugu Danmarkip nunamini namminermi susassaqarfii pillugit nammineq ingerlatsissasoq, nunarpullu tassunga tunngatillugu akuussanngitsoq, kingusinnerusukkulli, nunarput toqqaannartumik kalluarneqalerpat toqqaannartumik isumaqatigiinniarnerit aallartinneqarumaartut:
- Kissaatitut piumasaqaatitullu pingaartinnerpaasarput tassaavooq nunarput tassaaassasoq sakkussakillisaaffik. Taannali aamma oqimaalutarneqartussaassaaq tassami pissutsinik nammineq sunniuteqarfiginagulu aqussinnaanngisatsinnik nunarsuarmioqatigiit akornanni pisoqartuarpoq, aamma nunatta NATO-mik suleqateqarnera isumaqatigiinniarnerup ingerlanerani nikisitsisoqarsinnaanera sillimaffigissariaqakkatta ilagaat, Motzfeldt Sermitsiaq.AG-mut oqarpoq.
Illersornissamut aningaasaliissutit nunatta ineriartorneranut tapertaassapput
Illersornissaqarfiup missingiutaa pillugu Vivian Motzfeldt isummersorusunngikkaluarluni oqaaseqarsinnaanngikkallaraluarlunilu, taamaattoq isertuarani Naalakkersuisut pingaarnersiuinerannit ersersitserusuppoq, tassalu illersornissaqarfimmut aningaasaliissutit Kalaallit Nunatsinni atorneqartussat pillugit, nunatta sakkussakillisaanissamik tunngaveqartumik ingerlatsiviunissaanik piumasaqaateqarnerup saniatigut kissaataanerarpaa, aningaasaliissutit taakku atorlugit inuiaqatigiit ineriartornerannut nukittorsaataassassut, tassa illersornissaqarfiup suliaminik nunatsinni isumannaarinninneranut atatillugu pisortat, suliffeqarfiit, suliffissuaqarfiit aamma ilisimatusarnermik ingerlatsiviit kiisalu attaveqaqatigiinnikkut illugiimmik naammassinnissinnaanerup (dual use) atorneqarnerisigut ineriartornermut tapertaasutut atorneqassasut.
- Assersuutigiinnarlugu Illersornissaqarfik radarersuarmik nunatsinni inissiiniassappat, taannalu silaannartatsinnik nunamik imaanillu nakkutilliinermut atorneqartussatut sanaartorneqassappat, taava naatsorsuutigaarput nunatsinni suliffeqarfiit kiffartuussillutillu atortussanik pilersuisuutinneqassasut, aamma sulisussat nunatsinneersut sapinngisamik annerpaamik atorneqassasut qulakkeerneqassasoq piumasarissagipput naatsorsuutigineqassaaq. Taanna assersuutaannaavoq Naalakkersuisunit pingaarnersiuinerput qanoq ittuunersoq ersersinniarlugu, Vivian Motzfeldt oqarpoq.