Illoqarfik innermik anitsisartumit eqqorneqartoq: Naalagaaffiup illut pisiariniarpai
Illoqarfimmi nunap sajunneranit eqqugaasumi Grindavíkimi Reykjanesip qeqertaasa ilaanniittumi illunik pisinissamut Islandimi naalakkersuisut piareersimapput, inatsisissatullu siunnersuut tusarniaassutigineqarpoq.
Grindavíkimi innuttaasut novembarimili innermik anitsisartup anitsinerata kingorna ajornartorsiuteqarsimapput, ilaatigut qimagussuisoqartariaqartarsimavoq illullu ajoquserneqartarsimallutik.
Islandimi tusagassiorfik Iceland Review naapertorlugu illuutaat pisiarineqarsinnaasut taakkualu illunut taarsigassarsiaanik tigusinissaq Islandimi naalakkersuisut maanna neqeroorutiginiarpaat. Islandimi naalagaaffimmut aningaasartuutit 3 milliardit koruunit missaanniissasut missingersorneqarsimavoq.
Qinnuteqarnissamut killigititaq
Naalakkersuisut tallimanngormat ataatsimiinneranni pisisinnaanissamut inatsisissatut siunnersuut isumaqatigiissutigineqarlunilu tusarniaassutigineqarpoq.
Inissiaatileqatigiiffimmik pilersitsisoqassasoq pilersaarutaavoq, taannalu Grindavíkimi illunik piginnittunit illuminnik tuniserusuttunit pisinissaq ingerlatsinissarlu ingerlatsissaaq. Aammattaaq ilisimatitsissutigineqarpoq Grindavíkimi innuttaasut 3.800-t juulip aallaqqaataata tungaanut illuminnik tuniniaanissaminnut qinnuteqarsinnaasut.