Illorsuit pillugit Naalakkersuisoq: Nuuttoqarsinnaanera suli periarfissaanngilaq
Karrani alapemaarsuinermut atortorissaarutit nutaat ikkussorneqareeraluartut, nunaqarfinni pineqartuni oqartussat allaffiannik ammaaqqittoqaqqinnissaa pilersaarutigineqanngilaq. Kangerluup ilaa taakkununnga atasoq suli navianartorsiorfiusutut isigineqartariaqariaqarpoq, Aqqaluaq B. Egede ilisimatitsivoq.
Karrani atortorissaarutilersuisoqarsimanera pissutaalluni Karrani nunaqarfinni innutaasa uterfigisinnaassaneraat Siumup Inatsisartuni ilaasortaata Jens Kristian Therkelsenip Naalakkersuisunut apeqqutigaa.
Taamaattoqassanngitsoq paragraf 37 naapertorlugu akissuteqaammi naalakkersuisoq Aqqaluaq B. Egede (IA) Jens Kristian Therkelsenimut akissuteqarpoq.
- Qaqqap sisooqqissinnaanera suli annertoorujussuarmik aarlerinaateqarpoq. Taamaattumik Kalaallit Nunaanni Upalungaarsimanermut ataatsimiititaliap upalungaarsimanikkut naliliinera
imaappoq, Nuugaatsiaq aamma Illorsuit, kiisalu kangerluup ilaa taakkununnga atasoq suli navianartorsiorfiusutut isigineqartariaqartut. Tamanna malillugu Kalaallit Nunaanni Upalungaarsimanermut ataatsimiititaliaq naliliivoq innuttaasut tunngavissat pigineqartut tunngavigalugit Nuugaatsiamut Illorsuamullu suli utertariaqanngikkaluartut, aammalu navianartorsiorfiusut taakkua qanitaanni angalaartoqartariaq anngikkaluartoq.
Tusass atuutileqqissanersoq apeqquteqarpoq
Illorsuit, 2017-mi inuisa peqquneqarlutik qimammassuk, ilutigalugu Tusassimut attaveqaatit
qaminneqarput, apeqquteqarnerminut ilaatigut tunngaviliivoq.
- Takorlooruminaapporlu pisortat pigisaat ammaqqinneqassanngippata innuttaasut
uternissaminnut takorluuiuminaatitsissasut, allappoq.
Naalakkersuisut upalungaarsimanermut ataatsimiititaliap politiillu nalilersuineri malikkaat, kiisalu qaqqap sisooqqissinnaanera suli annertoorujussuarmik aarlerinaateqartoq ilisimatitsissutigalugu. Naak nunap sisoornissaanik aallerisaarisoqartaraluartoq Illorsuup eqqaani inoqartuartoq Jens Kristian Therkelsenip tikkuarpaa.
- Illorsuit eqqaat ukioq kaajallapajaarlugu (sikuniarnera akunnassisimanera kisiat pinnagu)
aalisartunit piniartunit angalasunillu inoqartuartarpoq. Aalisarfissuummat pingaartumik sila
ajortinnagu ilaatigut angallaterpassuit najortarpaat. Ukiumilu snescooterit aamma amerlasuut
aalisarfigisarlugu, politikeri allappoq.
Paasissutissiinerit
Qaqugu ataatsimiisitsisoqaqqissanersoq aamma paaserusuppaa.
- Illorsuit navianartorsiorfiuinnartillugu tassani innuttaasunik ataatsimiititsisoqassanngilaq, akissutigineqarpoq.
- Naalakkersuisup innuttaasunik ataatsimiititsiniarluni, tassungalu ilanngullugu alapemaarsuinermut atortorissaarutinit paasissutissat nalunaarsukkat katersomeqartut siulliit
saqqummiunniarlugit, ukioq naatinnagu Uummannamut nunaqarfinnullu attuumassuteqartunut angalanissaa pilersaarutigineqarpoq, naalakkersuisoq ilisimatitsivoq.