Illuatungiliuttut: Kielsenip allatuulli inatsit malittussaavaa

Naalakkersuisut Siulittaasuata Kim Kielsenip inatsisinut malittarisassanullu akerliusumik iliuuseqarsimanera illuatungiliuttunit sakkortuumik isornartorsiorneqarpoq. Atassutip siulittaasua Aqqalu Jerimiassen narrujuummisimavoq.

- Unioqqutitsisumik iliuuserineqartartut akuersaartuaannassavavut? Tamanna unittariaqalerpoq, Aqqalu Jerimiassen Sermitsiaq.AG-mut oqarpoq.

IA-mi siulittaasoq aamma iluarinninngilaq:

- Erseqqissumik isumaqarpugut. Suliaq tamarmi akuersaarneqarsinnaanngilaq. Isertuussineq inatsisinillu unioqqutitsiarnerit naammalerput, Múte B. Egede oqarpoq.

Tillie Martinussen Suleqatigiissitsisuneersoq paasissutissanut nutaanut pakatsisimavoq.

- Soorunami Kim Kielsenip nunami inatsisit malittarisassallu malittussaavai. Aqutsisutut siulliulluni iliuuseqartussaavoq innuttaasullu aqqutissiuullugit. Aleqa Hamondip tukattumik suliaqarneranut akerliulluni siulittaasunngornikuuvoq. Taamaammat taamatut ingerlasoqarnera isigalugu uggornarpoq, inuuttaasullu naammaginnilerput, Tillie Martinussen oqarpoq.

Isertuussinersuaq unitsinneqarli

Partii Naleqqami siulittaasoq Hans Enoksen isumaqarpoq, nipisattassiissutinik qaffaasimaneq Kielsenillu angallamminik attartortitsinera pillugit suliami ataatsimiitialiap paasissutissanik pissarsisinnaasimannginneranut attuumassuteqarsinnaasoq.

- Inatsisartut ataatsimiititaliaata paasissutissanik kissaatigisaminnik Naalakkersuisunit pissarsisinnaanngilluinnarsimanerat, tusagassiorfiit Danmarkimi Imarsiornermut Aqutsisoqarfiup allagaataanik takunnissimanerisigut ajoraluartumik nassuiaaserneqartoq, Hans Enoksen oqarpoq.

- Tassani erseqqissumik takuneqarsinnaavoq, Naalakkersuisut Siulittaasuata angallatimi inuussutissarsiutigalugu aalisarnissamut akuersissuteqarnissaa isumaginngisaannarsimagaa, aamma Aalisarnermut, Piniarnermut Nunalerinermullu Naalakkersuisoqarfimmit tamanna 2018-imili ilisimaneqarsimasoq, Hans Enoksen oqarpoq.

Hans Enoksenip aamma apeqquserpaa, naalakkersuisoqarfimmi sulisup ataatsip sooq Imarsiornermut Aqutsisoqarfimmik oqaloqateqartinneqarsimanera.

- Naalakkersuisut Siulittaasuata naalakkersuisoqarfimmi sulisut nammineq inuttut kiffartuunneqarnissaminut atorsinnaanngilai, allallu tamaassa assigalugit inatsimmik malinnittussaalluni, Hans Enoksen oqarpoq.

Partiit naalakkersuisooqataasut akuliunneqartut

IA-mit Atassummillu isumaqarput, partiit naalakkersuisooqataatitaqartut imminnut qiviarlutik eqqarsaatigisariaqaraat, Kielsenimik tapersersuinnassanerlutik.

- Naalakkersuisooqatigiit amerlanerussuteqartuartillutik tapersersortuasssavaat, maannali tamanna unitsittariaqarpaat, Aqqalu Jerimiassen oqarpoq.

Múte B. Egedemit taperserneqarpoq.

- Arlaannik maanna pisoqartariaqarpoq. Naalakkersuisoqatigiit saqqummerlutik oqaaseqartariaqarput. Isertuussineq naammalerpoq. Oqaaseqarusunngikkunik pisimasoq akuersaarsimassavaat, Múte B. Egede oqarpoq.