Ilulissani ipilluni ajunaartoq
Ilulissani nukappiaraq 14-inik ukiulik ippassaq unnukkut umiarsualivimmi ipisimasoq nassaarineqarpoq.
Nukappiaraq 14-inik ukiulik ikinngutinilu, umiatsiamik allamik angallatilik, Ilulissat umiarsualiviata eqqaani umiartuaqattaarsimapput. Nukappiaqqap umiatsiaq ilisarisimasaminit atorsimavaa sungiusaatigalugulu angalaarujoorluni.
– Nukappiaqqat angerlarnialeramik ingerlaqatigiikkaluarput nukappiaqqalli aappaata umiarsualivimmut pulagami paasivaa aappi ingerlaqatiginagu. Uterluni ujaraluarpaa nassaarinaguli. Angerlamut aallarpoq eqqarsarluni 14-inik ukiulik suli umiatsiaqattaarusussimagami takussaanngitso, eqqaaqqinnagulu. 14-inik ukiulik nal. 22-p eqqaanni angummit angalaareerluni angerlartumit umiarsualiviup eqqaani puttasoq nassaarineqarpoq, politiit pisortarigallagaat Preben Markvardsen oqarpoq.
Nukappiaraq nassaarineqarami nillertissimaqaaq politillu ilimagaat nukappiaraq nillertippalaarluni ipisimassasoq. Timimigut ajoqusersimanngilaq politiillu pisoq ipilluni ajunaarnertut naatsorsuutigaat, nukappiaqqap qanoq isilluni pinerpoq immamut nakkarnerata kingunerisaanik.
Umiatsiaq ullaatungaa nal. 9-p missaanni Oqaatsut ungasinngisaanni nassaarineqarpoq.
Nukappiaqqap angajoqqaavi ilisimatinneqareerput.