Ilulissani Qaqortumilu tillinniartoqarnerani takunnissimasunik ujaasisoqarpoq
Ilulissani eqqumiitsulianik saqqummersitanik katersugaasivik aamma Qaqortumi nerinialuttarfik ataasinngornerup ullaassaani tillinniarfigineqarsimapput.
Illoqarfinni assigiinngitsuni marlunni ataasinngornerup ullaassaanni tillinniartoqarsimaneranut atatillugu politiit takunnissimasinnaasunik ilisimannittunilluunniit ujaasipput.
Pisaartut pisortaat Carl Sværd Sermitsiaq.AG-mut taama ilisimatitsivoq.
Ilulissani eqqumiitsulianik saqqummersitanik katersugaasivimmi tillinniartoqarsimaneranik nalunaarut politiit nal. 02.11 pivaat. Pigaartut pisortaat ataasinngornermi ullaakkut oqaluttuarpoq suut tillinneqarsimanersut suli qulakkeerneqavinngitsoq.
Tillinniarneq aappaa Qaqortumi pivoq. Politiit nal. 04.03 nalunaarfigineqarput Café Inugssuk tillinniarfigineqarsimasoq.
Tillinniat viinninik tassani tillissimapput.
Takunnittoq politiinut ilisimatitsisimavoq nerinialuttarfimmut inuit marluk 20-t 25-llu akornanni ukioqarsorinartut nammattagalisarlutik isersimasut.
Sulianut tunngatillugu ilisimannittut takunnissimasulluunniit politiinut saaffiginneqquneqarput uunga 70 14 48.