Ilulissani utoqqaat illuanik nutaamik sanaartornissaq qularnarsilersinnaasoq
Avannaata Kommunia namminersorlutik oqartussanut saaffiginnissapput Ilulissani utoqqaat illuanik nutaamik sanaartornissap aappaagu aallartinnissaanut aningaasaliinissamut qulakkeerinneqqusillutik. Tamanna iluatsittariaqarpoq sanaartorneq aallartissappat.
Naqqiut: Allaaserisami allaqqasimavoq Ilulissani utoqqaat illuanik sanaartornissaq aningaasaliiffigineqarsinnaanngippat unitsinneqaratarsinnaasoq. Taamaattoqanngilaq, eqqortuusorli tassaavoq kommunip Namminersorlutik Oqartussat saaffigigaa aappaagu sanaartornerup aallartinnissaanut aningaasaleeqataanissamut tunngatillugu.
Ilulissani utoqqaat illuanik quleriinnik pingasuusunik nutaamik sanaartornissaq aappaagumut aningaasalerneqanngikkuni aappaagu aallartissinnaanngilaq. Avannaata Kommuniatalu Namminersorlutik Oqartussat saaffigissavaa sanaartornermut aningaasaleeqataanissamut isumaqatigiissut malillugu sanaartornissamut aningaasartuutit affaat 2024-mut aningaasanut inatsimmut ilanngutseqqussallugit. Avannaata Kommuniani kommunalbestyrelse pingasunngornermi 23. august immikkut ittumik ataatsimiinnermini tamanna aalaajangerpaa.
Sanaartornissamut pilersaarusiorneq kommunip Namminersorlutillu Oqartussat avillugu akileqaataaffigereersimavaat, Ilulissani utoqqaat illuani inissat amerlanerusut pisariaqartinneqarmata. Isumaqatigiissutaareerporlu isaterinissamut sanaartornissamullu aningaasartuutit kommunimit Namminersorlutillu Oqartussanit aamma avillugit aningaasalerneqassasut.
Suliami tullinnguuppoq utoqqaat illuanik atuuttumik isaterineq, nutaamillu sanaartorneq. Tamassumunnga aningaasat 81,4 mio. kr.-t atorfissaqartinneqartutut naatsorsorneqarsimapput.
Kommunip aningaasartuutit affaat, tassa 40,7 mio. kr.-t katillugit aningaasartuutigissavai, taamaattumillu sanaartornerup aallartinnissaanut aappaagumut 10 mio. kr.-t illikartinneqassasut siunnersuutigineqarpoq.
- Suliassap piviusunngortinnissaanut piumasaqaataassaaq aamma Namminersorlutik Oqartussani Inatsisartut aningaasanut 2024-imi inatsisissaannut isumaqatigiinniarnerni missingersuutit taamaaqataanik imaqarnissaat, ataatsimiinnermit imaqarniliami allassimavoq.
Namminersorlutik Oqartussat aappaagumut aningaasanut inatsimmut isumaqatiginninniutissatut 15 mio. kr.-t illikartissimavaat.
Suliniut angisuut arlallit - aningaasarliornerup nalaani
Avannaata Kommunia aningaasaqarniarnikkut maanna ilungersunartorsiorpoq. Kommuni Ilulissaniinnaq 26,4 mio. kr.-nut sanaartortitsinissamut pituttuisunik isumaqatigiissuteqarpoq, kommunilu tamakkerlugu suliniutinut pituttuisumik isumaqatigiissutit 40,2 mio. kr.-nik aningaasartuuteqarfiupput. Kommunalbestyrelsep akuersineratigut suliniummut pituttuisumik isumaqatigiissummut kommuni 10 mio. kr.-nik aappaagu aningaasartuuteqassaaq.
- Ukiuni makkunani Avannaata Kommuniani aningaasatigut sinaakkutissat tatineqarput, pilersaarullu manna ukiuni aggersuni sanaartugassanut aningaasaliissutigineqarsinnaasut ilarpassuinik sunniuteqarlunilu periarfissaasuasitsisussaavoq, allassimavoq.
Kommunalbestyrelsep aalajangereernikuuaa aningaasaatit atoriaannaarnik attartorsimaneq 20 mio. kr.-miit 35 mio. kr.-mut qaffanneqassasoq, ingerlatsiviillu tamarmik aningaasanut missingersuutigisanit 2 procentimik sipaarniuteqassasut.
Kommune naliliivoq utoqqaat illuani inissat amerlanerit pisariaqartinneqarluinnartut, taamaattumillu sanaartornissaq pisariaqarluinnartoq.
Ukiuni pingasuni tullerni aningaasartuutissarpassuit
Avannaata Kommunia aningaasartuutinut pituttortussanngorpoq sanaartortitsissalluni.
Sanaartorneq aappaagu aallartinneqarpat illuutigineqartoq isaterneqassaaq.
Kommuni utoqqaat illuliortitsinermut 2024-mi 10 mio. kr.-nik, 2025-mi 18 mio. kr.-nik aamma 2026-mi 12,7 mio. kr.-nik aningaasaliissaaq. Sanaartortup KJ Greenlandip naatsorsuutigaa sanaartorneq 2026-mi naammassissasoq.
- Sanaartorneq 2024-imi aallartinneqassaaq pilersaarutillu malillugit 2026-imi naammassineqassalluni. Isaterinerup nalaani pisariaqassaaq utoqqaat inissisimaffigigallagassaannik nassaarnissaq, tamannalu misissorneqarpoq siunnersortit illoqarfimmilu soqutigisaqartut siunersiorneqarnerisigut.
Sanaartornerup aningaasaleeqataaffigineqarnissaanut aningaasat illikartitassat pillugit kommunip siunnersuutaa Naalakkersuisuni kingusinnerpaamik 5. september suliaralugu ataatsimiissutigineqassaaq. Ukiuni tullerni aningaasaliinissamut missingiussat akuerineqassapput, aningaasallu aningaasanut inatsimmut 2024-moortumut inissillugit.