Ilulissat eqqaanni unioqqutitsilluni aalisartoqartartoq
Sinerissap qanittuani qaleralinniarneq naammaginartumik nakkutigineqanngilaq. Aammali qassutaarsiutit ningittagaarsiutillu ima amerlatigipput, Ilulissat eqqaanni aalisarfiit ilaat aalisarfigineqarsinnaajunnaarsimallutik. Taama oqarpoq aalisartoq 63-nik ukiulik. Pissutsit tamakku atuunneri aalisarnermik sulialinnit politikerimillu naqissuserneqarput
Ilulissani aalisartut ilaasa aalisarnermik malerugassat unioqqutillugit qaleralinniartarnerat aalisartut akornanni amerlasuutigut nipangiusimaannarneqartarpoq, Sermitsiaq allappoq.
Aammali qassutaarsiutit ningittagaarsiutillu ima amerlatigilersimapput, aalisarfinni qaleraleqassutsimut akornutaaginnaratik, aalisarfiilli ilaasa aalisarfigineqarsinnaajunnaarnerannik kinguneqarluni. Kisiannili pissutsit tamakku pisortanit naammaginartumik nakkutigineqanngillat, tamatumalu kingunerisaanik unioqqutitsillluni aalisarneq annertusiartortoq, Ilulissani aalisartoq misilittagartooq 63-inik ukioqartoq, Karl Thomassen oqarpoq.
- Qassutit taama amerlatigisut annaaneqartartillugit, tamanna aalisarnermik pitsaasumik ingerlatsinertut taaneqarsinnaanngilaq. Qassutaarsiutimmi ima amerlatigisarput, aalisarfiit ilaat ningittagarsorluni aalisarfigineqarsinnaanatik. Aammali aalisarfissatut killiliussat avataasigut aalisartoqartartoq ilisimaneqarpoq, Karl Thomassen Sermitsiamut oqarpoq.
Allaaserineqartoq aviisimi Sermitsiami tamakkiisumik atuarneqarsinnaavoq. Aviisi uani pisiariuk: