Ilulissat imaluunniit Aasiaat
Avannaata kommunerujussuassaani qitiusumik allaffeqarfissaq Siumup Ilulissani Aasianniluunniit inissilersaarpaa.
Maanna oqallisigineqarpoq Avannaata kommunerujussuassaani qitiusumik allaffeqarfik sumut inissinneqassanersoq. Siumukkormiut Ilulissat imaluunniit Aasiaat tikkuarpaat.
– Avannaata Kommuniani allaffissornikkut aqutsiveqarneq Aasianni Ilulissanilu inissineqarsinnaavoq, aammali illoqarfiit pineqartut nukittuffii aallaavigalugit ingerlatsiviit assigiinngitsut agguaanneqarsinnaapput, taama Avannaani Siumut nalunaarpoq.
Inuit Ataqatigiinneersup Bendt Kristiansen-ip aningaasartuutaasussat naalagaatinniarpai.
– Qitiusumik allattoqarfik inissinneqartariaqarpoq illoqarfimmut ingerlatsinikkut akikinnerpaaffingisassaani. Qitiusumik allattoqarfik sumulluunniit inissinneqassangaluarpat Qaanaami sullinneqartup malunginavianngilaa, taama Bendt Kristiansen oqarpoq.