Ilulissat: Qaartitsinermit siullermit video takuuk

Mittarfik 2.200 meterinik takissuseqartussaq Munck Gruppip suliaralugu aallartinneqarnera ullumi aallartinneqarpoq, tassami pingasunngornermi nalunaaqutaq 13.00 qaartitsisoqaqqaarpoq.

Pisortaqarfinni siulersuisunilu ilaasortat Namminersorlutik Oqartussat suliffeqarfiutaannit tamaneersut isumasioqatigiisinneqarput, tassanilu peqataasut qaartitsisoqaqqaarneranut qaaqquneqarput. Naalakkersuisunut ilaasortat aamma Kim Kielsen peqataapputtaaq.

Killiffik pingaarutilik

- Killiffik pingaarutilerujussuaq inuussutissarsiutinik nutaanik pilersitsiffiusussaq taamalu nunatsinni inuiaqatigiinnut iluaqusiiumaartussaq atuutilerumaarpoq, Avannaata Kommuniani borgmesteri Palle Jerimiassen qaartitsisoqareersoq kommunip nittartagaanut ilaatigut oqarpoq.

Kommunimi ineriartorneq

Takornarialerinermi ineriartortoqarluassasoq borgmesteri ilaatigut oqarpoq.

- Mittarfiup allilerneqarneragut inuussutissarsiornikkut ineriartornerup suli annertuseriarnissaa qularutissaanngilaq. Nunanit allaneersut ineriartornissami peqataarusullutik aningaasaliissuteqarniarlutik saaffiginnittarput, ilisimaarereertariaqarparpulli ineriartorneq avataaniit aqunneqassanngimmat. Ineriartornissaq uagut nammineq nunatsinniit siuttuuffigissavarput. Taamaattumik-una aamma illoqarfimmik ineriartortitsinissamik ingerlatseqatigiiffik pilersikkipput, taamaasiornitsigut najukkami inuussutissarsiutinik suliaqartut ineriartornermi akuutinneqarniassammata – Ilulissaniinnaanngitsoq aammali kommunip sinnerani, Palle Jerimiassen oqarpoq.

Ilulissani mittarfittaassarsuup nunarsuup sinneranut ammaassisussap sanaartorneqarnera 2023-mi oktobarip 23-ani naammassineqassangatinneqarpoq.

Video uani takuuk: