IMAK eqqartuussiviit qullersaanni Højesteretimi suliami ajugaatinneqartoq
Eqqartuussiviit qullersaata Højesteretip sulisumik peersitsineq tunngavissaqanngitsoq ilalerpaa. Sulisoq kommunimit suliunnaarsitaasimavoq sulisoq atorfeqarnermi nalaani kommuni qimallugu nuummat.
Pingasunngornermi 8. juni Eqqartuussiviit qullersaat - Højesteret - Ilinniartitsisut Kattuffiata IMAK-ip ilaasortami ilaat sinnerlugu Kalaallit Nunaanni kommunimut tunngatillugu tunngaviusumik aalangiiffigisassatut suliakkiissutaa pillugu eqqartuussivimmi aalajangiivoq.
Aalajangiinermi IMAK Højesteretimit ilalerneqarpoq. Sulisoq kommunimi suliffigisamini najugaqartussaasutut piumasaqaateqarfigineqanngilaq, kommunilu sulisup sivisuumik napparsimanermini najukkaminik allanngortitsinera tunngavigalugu suliunnaarsitsisinnaanani.
Suliaq naatsumik
Kommuni 2019-imi IMAK-imut ilaasortaq soraarsippaa, ilaatigut pissutigalugu ilaasortaq napparsimasutut sulinnginnermi nalaani Danmakimut nuussimammat, tassungalu atatillugu najugaqarfini inuit aqqisa allattorsimaffianni Danmarkimut nuussimallugu. Taamaaliorpoq Danmarkimi peqqissaavimmi katsorsarneqarsinnaajumalluni nakorsamiillu napparsimasutut uppernasaammik pissarsisinnaajumalluni.
- Suliami pineqartumi pingaarnersaavoq, sulisoq Kalaallit Nunaanni atorfeqartoq, napparsimasutut nalunaaqqanermi nalaani, taamaalillunilu suliartornissamut pisussaaffeqannginnermi nalaani, najugaqarfini Danmarkimut nuussinnaanera, IMAK-imi siulittaasoq Elna Heilmann tusagassiorfinnut nalunaaruteqarluni allappoq.
Suliaq manna pingajussaat suliarineqarpoq. Eqqartuussivimmi kommuni suliami ajugaatinneqarpoq. Nunatta Eqqartuussiviatali suliami aalajangiineq allanngortippaa, IMAK ajugaatillugu. Højesteretillu suliami IMAK maanna ajugaatippaa, Nunatta Eqqartuussiviani aalajangerneq atortussanngortillugu.
Tunngaviusumik suliakkiissummi ajugaasoq
Højesteretip aalajangiineratigut suliaq naammassineqarpoq. Sulisorlu kommunimit 300.000 koruuningajannik ajunngitsorsiassaqartinneqartussanngornini nuannaarutigisinnaagaa, IMAK allappoq.
Eqqartuussissuserisup Britta Keldsenip Arctic Lawimeersup, IMAK sinnerlugu Højesteretimi suliaq pillugu sassartuusup, aalajangiissut nuannaarutigaa.
Taanna oqarpoq Kalaallit Nunaanni innuttaasut Naalagaaffeqatigiinnerup iluani nuttarsinnaanermik pisinnaatitaaffeqartut, Kalaallit Nunaannilu sulisut immikkut ittumik killilersorfigineqassanngitsut.
- Kommunip pineqartup suliamut tunngatillugu tunngavilersuutigigaluarpaa, peqqissinermi Danmarkimiit Kalaallit Nunaannut suliartoqqinnissamut ullut arlallit qaangiunneranni aatsaat suliffimmut annguttoqarsinnaanera, tamannali Eqqartuussiviit qullersaata - Britta Keldsenip tunngavilersuutai assigalugit - pingaaruteqartutut nalilinngilaa.
- Eqqartuussiviit qullersaata - Nunatta Eqqartuussivia assigalugu - aalajangerpaa Kalaallit Nunaanni suliffeqarneq pissutigiinnarlugu toqqaannartumik piumasaqaatitulluunniit Kalaallit Nunaanni najugaqarnissaq pisussaaffiusinnaanngitsoq - matumanissaaq Eqqartuussiviit qullersaat isumaqarpoq Kalaallit Nunaanni atorfeqarnermi atugassarititaasut Danmarkimi atugassarititaasunit allaanerussanngitsut, IMAK aalajangerneq pillugu tusagassiorfinnut nalunaarutimini allappoq.