IMAK: Ilinniartitsisut aningaasatigut malinnaasinnaanngillat
Pissutissaqarpasippoq ilimatsaassallugu aningaasat naleerukkiartornerat aqukkuminaassiartuinnartoq. Maanna ilinniartitsisut kattuffiat piumasaqalerpoq pisortat suliffeqarfiutaasa akinik qaffaasarnermut peqataanerat unitsinneqassasoq.
Nunatsinni naalakkersuisut, aktiaatileqatigiiffiit Namminersorlutik Oqartussat pigisaat kiisalu suliffeqarfiit namminersortitat pisortanit pigineqartut, nunatsinni innuttaasut inuuniarnerannut assoroortitsipput, taamak ersaritsigisumik ilinniartitsisut kattuffiat IMAK uparuaavoq piumasaqarlunilu naalakkersuinikkut iliuuseqartoqassasoq.
Aningaasarsiat akiliissutissatut naammanngillat
- RAL-p assartuinermi akit qaffaqqinniarlugit nalunaarutigeqqammerpaa sulilu aamma ukiuni tulliuttuni qaffaaqqilersaarnertik ilimasaarutigalugu. Tamatuma kingunerisaanik nunatsinni niuertut annerit pisiniarfinni nioqqutissanik akitsuisoqarnissaa ilimasaarutigereerpaat. Tamanna ilaasortatta nammassinnaanngilaat, taamak isornartorsiuivoq IMAK-ip siulittaasua, Elna Heilmann nangillunilu:
- Kalaallit nunatsinni ilinniartitsisut ilaasortagut aammalumi inuiaqatigiit tamatta inuuniarnitsinni ilungersoreersugut maannakkut qaavatigut akiliisussanngortinneqarpugut.
Pisortat suliffeqarfiutaat akitsorsaataaqataapput
Ilinniartitsisut kattuffiannit aaqqiissutaasinnaasutut tikkuagaqarput, innuttaasut minnerunngitsumillu ilinniartitsisut aningaasat naleerukkiartornerannik annertuumik eqqugaasut suli annertusiartortumik eqqugaassanngippata aaqqiissutaasinnaasutut isigisaminnik, tassalu pisortat ingerlatsiviisa suliffeqarfiutaasalu akitsorsaataaqataanerannik unikaallatsitsineq aqqutissaasorigamikku:
- Naalakkersuinikkut suliffeqarfissuillu pisortanit piginneqataaffigineqartut ataqatigiinngitsumik ingerlatsinerat innuttaasunut kingunerluttusanngoqqippoq, Elna Heilmann tikkuaavoq nangillunilu:
- Taakkua ukiorpassuarni akinik qaffaasaqattaartarput, naalakkersuinikkut annerusumik akuliuffigineqassanatik. Akit qaffaatissaat piviusunngoreersut aatsaat Naalakkersuisunit oqaaseqarfigineqalaartarput, inuiaqatigiit ukapaatillugillusooq.
Inissiani akisoorujussuarni najugaqartinneqartut
Ilinniartitsisut ilinniagaleqatigiiaakkaani nuttartarnerat allanut sanilliullugu akulikinneruvoq, tassunga pissutaasut ilagaat nunarput tamakkerlugu ilinniartisisut naammattut pigineqannginnerat. Nuttartarnerisalu kingunerisaasa ilagaat inissianik attartortittakkanik ilinniartisisut ikigisassaanngitsut pinngitsuuisinnaannginnerat:
- Ilinniartitsisut soraarninngornikut, ilinniartitsisut nunaqarfinni isorliunerusunilu atorfillit, ilaasortagut kisermaat, ilaasortagut atorfinerlaat atorfeqareersullu inissiani akisuuni najugaqartinneqartut ulluinnarni inuuniarnikkut assorooreeqisut akitsuinernut nutaanut akissaqanngillat.
- Tassa akitsuiuarneq akuereqqissinnaanngilarput! Inuttut naleqassassuseq annertuumik innarlerneqaqqavoq.
- Isumaqarluinnarpunga naalakkersuisut suliffeqarfissuillu pisortanit piginneqataaffigineqartut akitsuinissaat unitsinneqartariaqartoq, taamaattoqarnianngippat pisissutigisinnaasarput akiliisinnaassuserpullu nalittorsarniarlugit aaqqiissuteqartoqartariaqarpoq, IMAK-ip siulittaasua Elna Heilmann naggataatigut oqarpoq.