Imerajuttunik katsorsaaviup kommunit utaqqivai
Tamassuma tungaanut Agathe Fontain Qaqiffiup immikkoortoqarfiinik nutaanik pilersitsinianngilaq.
Kommuneqarfik Sermersooq Tasiilami illuni Prs. Margrethes Børnehjemmip inissisimaffigisimasaani ilaqutariinnut katsorsaavimmik pilersitsiniarpoq, imerajuttunillu katsorsaanerup kommuninit tiguneqarnissaanik Naalakkersuisut kommuneqarfiit kattuffiat Kanukoka aalajangiisuusumik isumaqatigiinniarfigaat.
– Taamaattumik kommunit namminersortuunerat ataqqillugu Tasiilami atornerluisunut katsorsaaviup Qaqiffiup immikkoortoqarfianik pilersitsinianngilagut, peqqissutsimut naalakkersuisoq Agathe Fontain, Inuit Ataqatigiit oqarpoq.
Peqqinnissaqarfip Frederiksberg Centeret isumaqatigiissuteqarfigisimavaa Nuummi Ilulissanilu katsorsaaviit ingerlannissaannik.
Siumut siulittaasuata Aleqa Hammondip, Tasiilamut tikeraareerluni innuttaasunillu ataatsimiititsereerluni siunnersuutigaa illoqarfimmi Qaqiffiup immikkoortoqarfianik pilersitsisoqassasoq Tunumut tamarmut atuuttussamik.
Ataasinngormat inatsisartuni akunnerit marluk oqallisereernerup kingorna pakatsilluni takuvaa siunnersuut amerlanerussuteqartunit itigartinneqartoq, allaallu Peqqissutsimut Ataatsimiititaliamut ingerlanneqanngitsoq.
Inatsisartunut ilaasortat marluk Tasiilami qinigaapput, Harald Biancolli, Inuit Ataqatigiit, imaluunniit Justus Hansenip, Demokraatit, Tasiilami Qaqiffimmik pilersitsisoqarnissaa isumaqatiginngilaat: – Aap, qanittumi katsorsaaveqalerusuppugut, taamaattumik kommunip suliniuteqarnera, tassani innuttaasut kissaatigisaannik naammassinnittussaq, nuannaarutigaarput, Harald Bianco oqarpoq.
Aaqqissuussaanermut ataatsimiititaliap isumaliutissiissummini 2005-imeersumi siunnersuutigaa kommunit aaqqissuuteqqinneqarnerannut atatillugu imerajuttunik katsorsaaneq kommuninit tiguneqassasoq, namminersorlutilli oqartussat kommunillu isumaqatigiinniarnerat unittoorsimavoq. Agathe Fontainip isumaqatigiinniarnerit aggustimi nanginniarsariniarpai, Kanukoka, borgmesterit atorfillillu peqatigalugit ulluni marlunni sammisaqartitsilluni.
Agathe Fontainilli paasisinnaanngilaa imerajuttunik katsorsaaneq kommunit tigujumanngimmassuk: – Kommunit ilisimanersaavaat kommunini inuiaqatigiinnut suut iluaqutaanersut.
Justus Hansen isumaqarpoq Aleqa Hammondip siunnersuutaatigut Tunu immikkut imerajuffittut saqqummiunneqartoq: – Sooq Siumup Tunumi imigassaq matuinnartarsimavaa, aamma sooq Siumup taamaallaat Tasiilami katsorsaaveqarnissaq siunnersuutigaa. Aap, ajornartorsiuteqarpugut, Kitaanili sumiiffippassuarnit annertunerunngitsunik.
Siumumeersup Malik Berthelsenip tamanna eqqunnginnerarpaa: – Kukkugunanngilanga oqassaguma Tunumi imigassamik ajornartorsiuteqarneq kitaanit annertunerujussuusoq.