Imigassartorsimalluni biilertoq ajutoortoq
Politiit ilisimatitsipput ajutoortoqarnerani aquttoq annerusumik ajoqusersimanngitsoq. Biilinik ingerlatsisoq, biilersinnaanermut allagartaqanngitsoq, imigassartorsimalluni biilinik ingerlatsisimasutut unnerluutigineqarpoq.
![Imigassartorsimalluni biilertoq ajutoortoq](https://image.sermitsiaq.ag/143203.webp?imageId=143203&width=960&height=518&format=jpg)
Kalaallit Nunaanni Politiit nalunaarfigineqarput biili Nuup Nuussuallu akornanni aqqusinermi sangusariakkut sapaatiummat ullaakkut nal. 04.45 missaani ajutoorsimasoq.
- Ajoqusertoqanngilaq. Aquttoq nammineq biilimit anisinnaasimavoq, taamaattumik ajornerusumik ajoqusersimanngilaq. Soorunami biilit ajoqusilaarput. Biilit tillinneqarsimasutut nalunaarsorneqanngillat, Kalaallit Nunaanni Politiini pigaartut pisortaat Mark Larsen Sermitsiaq.AG-mut oqarpoq.
Politiit apuukkamik paasivaat biilertoq aalakoortoq aammalu biilersinnaanermut allagartaqanngitsoq.
Biilersinnaanermut allagartamik pissarsisinnaajunnaarsinnaasoq
- Biilertoq imigassartorsimalluni biilersimasutut unnerluutigineqarpoq, aaversinnermit inerneri apeqqutaatillugit qanoq pineqaatissinneqarnersoq aalajangerneqassaaq, Mark Larsen oqarpoq.
- Akiligassinneqarsinnaasarput imaluunniit biilersinnaanermut allagartamik arsaarneqartarlutik. Maanna unnerluutigineqartoq biilersinnaanermut allagartaqanngereermat, pineqaatissiissutip sivisussusaa malillugu biilersinnaanermut allagartaqalersinnaanermut periarfissaqassanngikkallarpoq, pigaartut pisortaat oqaluttuarpoq.
DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...