Immap naqqatigut kabelissaq Telep piareersalerpaa
Immap naqqatigut kabelip qarasaasiakkut internetikkullu nunatta avataanut attaveqarneq pitsaanerusoq sukkanerusorlu qulakkiissagaa,
Kalaallit Nunaanniit Islandip aamma Canadami New Foundlandip (Paggivittap) tungaannut immap naqqatigut kabeliliinissamik pilersaarusiornissaq aasa'manna Tele Greenlandip ingerlappaa.
Immap naqqatigut kabeli aamma pilersuisussaanerup isumannaatsuunissaanik qulakkeerinnittussaavoq aammalu ukiuni aggersuni atuisunit atugaalersinnaasut kiffartuussissutit piginnaasamik nutaamik aammalu pitsaassutsimik pisariaqartitsisussat atorneqarsinnaalernissaanik ajornarunnaarsitsisussaassalluni, Telep pisortaa Brian Buus Pedersen Telep atuagassiami Online-mi allappoq.
Kabelip sukkut ingerlatinneqarnissaanik toqqaavinnginnermi immap naqqata pissusaanik peqqissaartumik misissuinissat pisariaqarput. Taamaammat Italiamiut Trieste-mi imaani ilisimatusarnermut umiarsuaata r/v Explora-p, kabeli inissiffigisinnaasaani immap naqqanik misissuinerit ingerlatissavai.
Umiarsuaq, sonarinik atortoqarluni ukioq manna juunip 27-anni Nuummit misissuilluni aallartittoq, Italiamiut suliffeqarfiutaannit Elettra-mit attartugaavoq, taassumalu TELE sinnerlugu immap naqqanik assiliartalersuineq suliarissavaa. Ukioq manna augustip naanerani misissuinerit naammassineqartussatut naatsorsuutigineqarput, tamatumalu kingorna paasissutissarpassuit misissuataarneqassapput.
Immap naqqanik misissuinerit saniatigut, aningaasalersuinerit aningaasaqarnerlu iluatsissinnaappata aammalu TELE-p siulersuisuinit Naalakkersuisuniillu akuerineqarsinnaappat, 2008-p aasaani ingerlanneqartussatut naatsorsuutigineqartumut kabelilersuinissamut TELE suliarinnittussarsiuussisussaavoq, Brian Buus allappoq.