Immikkoortortaq coronamik akiuisussaq pilersinneqartoq
Peqqinnissaqarfik, Nunatta Nakorsaaneqarfia aamma Peqqissutsimut Naalakkersuisoqarfik Covid-19-ip tunillaassuunnerani immikkoortortamik suliaqarluni akiuiniartussamik pilersitsipput.
Immikkoortortaqarfik nutaaq, qaammatini arfinilinni atuuttussatut inissinneqarallartoq, peqqinnissaqarfimmit, Nunatta Nakorsaaneqarfianit aamma Peqqissutsimut Naalakkersuisoqarfimmit pilersinneqarpoq.
Immikkoortortaq nutaaq Coronamik Akiuineq - Corona Bekæmpelsen, nuna tamakkerlugu tunillatsissimasunut qanillivallaarsimasunik attaveqarniartartussanik maanna sulisussarsiorpoq.
Coronamik Akiuineq – Corona Bekæmpelsen decemberip qulingani pilersinneqarpoq, suliassallu assigiinngitsut tulleriiaarlugit tigooralereerlugit, peqqinnissaq pillugu aqutsisut Sermitsiaq.AG-mut ilisimatitsipput.
Coronamik Akiuineq – Corona Bekæmpelsen Nuummi misissuisarfik, Dronning Ingridip Napparsimmavissua nunallu immikkoortuini qitiusumik peqqinnissaqarfiit suleqatigissavai.
- Corona pillugu sulianik ataatsimoortitsilernermi peqqinnissaqarfiup corona pillugu suliaanik nukittorsaassaaq kiisalu attaveqatigiinnerup, suleriutsip ataqatigiissaarinerullu pitsaanerulernissaanik neriuuteqarnarluni, peqqinnissaq pillugu aqutsisut Sermitsiaq.AG-mut allakkatigut akissuteqarlutik ilisimatitsipput.
Suleqatigiit 20-t
Coronamik Akiuineq – Corona Bekæmpelsen aasaq 2022 tungaanut atuuttussatut aallartinneqarpoq. Nunatsinnili coronamik tunillaassuunneq allanngorujussuarsinnaammat pilersaarut allanngorsinnaasoq aamma ilisimatitsissutigineqarpoq.
- Peqqinnissaqarfimmi sulisunik aamma allaffimmi suliaqarnermik misilittagaqartunik atorfinitsitsisoqassaaq. Suli qulakkeerneqanngilaq sulisut qasserpiaat pisariaqartinneqassanersut, Kalaallit Nunaanni Covid-19-ip tunillaassuunnera allanngoriasaarsinnaasarmat, tamannalu allatut suleriuseqalipallassinnaanermik piumasaqarmat. Naatsorsuutigineqarporli sulisut 15-it 20-llu akornanni sulisorineqassasut - taakkunanilu arlallit akunnermusiaqartinneqassallutik, ilisimatitsissutigineqarpoq.
Aqutsisumik "peqqinnissaqarfiup iluani aqutsinermik misilittagaqarluartumk" aamma atorfinitsitsisoqassaaq. Taassuma akisussaaffigissavaa corona pillugu allattoqarfiup, tunillatsissimasinnaasunik ujartuisartut aamma hotlinemi sulisut suliaasa ataqatigiissuunissaat.
- Immikkoortortani aqutsisut, suliaqartut aqutsisui teamlederillu aamma atorfinitsinneqassapput.