Immikkut ilisimasallit nannut pillugit oqallipput
Nunarsuatsinni nannut pillugit immikkut ilisimasallit 15-issaannik naapipput Københavnimi Kalaallit Sinniisoqarfiani.
Nunarsuatsinni nannut pillugit immikkut ilisimasallit 15-issaannik naapipput Københavnimi Kalaallit Sinniisoqarfiani. Ataatsimiinneq pivoq ulluni 29. juuni juulip ulluisa pingajuat 2009 ilanngullugu. Nunatsinni Pinngortitaleriffik ataatsimiisitsisuuvoq.
Seniorforsker Erik W. Born Nunatsinni Pinngortitaleriffimmeersoq Polar Bear Specialist Groupimi siulittaasutut nutaatut toqqarneqarpoq.
– Ataatsimiittut isumaqatigiissutigaat silap pissusaata allanngoriartornera aamma immap sikusartut annikilliartornera nannunik ulorianartorsiortitsinerpaasut. Allat ulorianartorsiortitsisut tassaapput mingutsitsineq, takornariaqarneq, pisuussutinik uumaatsunik piiaaneq, umiarsuit angallannerat, sumiiffinni ataasiakkaani amerlavallaanik pisaqartoqartarnera kiisalu inuit nunami nannunik naapitsisarnerisa kinguneranik nannunik toqutsisoqartariaqartarnera, taamatut allappoq Polar Bear Specialist Group tusagassiuutinut nalunaarummini.