Immineq kajumissutsiminik ikiuilluartoq nersornaaserneqartoq
Meeqqat Ikiortigit immineq kajumissutsiminik suleqataasumut ukiumoortumik nersornaasiissutigisartakkani, immineq kajumissutsiminik patajaalluni tunniusimalluarlunilu suleqataasumut nersorinnissutitut tunniuppaa sisamanngormat
Immineq kajumissutsiminik nersornaat Rebekka Olsvigimut tunniunneqarpoq, taanna ukiuni amerlasuuni Nuummi peqatigiiffimmi aningaaserisuusimavoq ikiorniakkanullu meeqqanut ilaqutaasunullu ingerlatassanik amerlasuunik pilersaarusiortuusarsimalluni.
Meeqqanut suliniaqatigiiffik Meeqqat Ikiortigit tusagassiutinut nalunaarummi allappoq.
- Rebekka Olsvig inuuvoq allanngujaatsoq tunniusimasorlu. Ingerlanneqartut amerlaqisut peqataaffigisarsimavai, ingammik silami assoroornalaartumik ingerlanneqartartut, uummataalu inuiaqatgiinni inunnut sanngiinerusunut tillertuuvoq, tusagassiutinut nalunaarummi Meeqqat Ikiortigit allappoq.
Nersornaaserneqartumut oqalugiarnermini siulersuisuunerni siulittaasup, Jonna Ketwap erseqqissarpaa immineq kajumissutsiminnik ikiuisartut peqatigiiffimmut qanoq pingaaruteqartigisut:
- Suliniaqatigiiffittut immineq kajumissuseq tunngavigalugu sulisumut, aningaasaateqartuugaluarutta avataanieersunut suliassat suliassanngortissinnaallugit, taava arlaannik pingaaruteqarluinnartumik amigaateqartoqalissagaluarpoq – tassalu qiimanermik misigissuseqarnermillu, Jonna Ketwa oqarpoq.
Rebekka Olsvigilu qutsavigaa nukissaqartuartarmat meeqqat pakkullugillu qungujuffiginissaannut:
- Illimmi Rebekka, meeqqat inuuneranni nalilinnik isumaqarluartunillu tunniussaqarfigiuartarpatit. Qujanaq.
Rebekka Olsvigilu killitsisimaarluni nersornaammut qujavaoq oqarlunilu, Quassannguup majuarnera ilaatigut takillunilu qasunarsinnaasaraluartoq, meeqqanik tasioraangami nuannersunngortuartartoq, qaqillunimi meeqqat nuannaarlutillu tanngassimaarnerat naliligassaaneq ajormat, taamaattumillu Nummi meeqanut aaqqissuussinerit nuannerunnaassanatik.
