Inalugallit qeqqussallu RG-p aningaasarsiornerulerfigissavai
Royal Greenland inalugalinnik aalisarnermik pitsaasumik misilittagaqarpoq, inalugallillu Asiami nunani piumaneqarluarput.
Canadamiut inalugalinnik aalisarnerannit misilittakkat ima pitsaatigilersimapput, Royal Greenlandip maanna Kalaallit Nunaata imartaani inalugalinnik aalisarnerup annertusinissaa aalajangersimallugu.
- Ullumikkut maani nunatsinni misileraalluni immap naqqani inalugalinniartoqartarpoq. Canadami misilittakkat pitsaalluinnartut tunngavigalugit maani nunatsinni immap naqqani inalugalinniarnerup samminerunissaa pissusissamisoorpoq, Royal Greenlandimi pisortaaneq Susanne Arfelt Rajamand Sermitsiaq.AG-mut oqarpoq.
Tunisassiorfiit atorluarnerullugit
- Aalisakkat nutaat Kalaallit Nunaanni ineriartornermik qulakkeerinissamut periarfissaqalersitsissapput. Tamatuma saniatigut aalisakkeriviit pitsaanerusumik ingerlannissaannut periarfissaqalersitsissapput, aalisakkeriviit tamakkiisumik atorneqanngikkaangata aalisakkat nutaat arlallit aalisarneqarsinnaammata, pisortaq oqaluttuarpoq, aamma tikkuarpaa qeqqussat tunisassiarineqarnerat neriulluarnartuusoq.
Inalugallit immap naqqa kiliorlugu pisarineqartarput, tamatumalu kingorna immikkoortiterneqartarlutik. Kalaallit Nunaata imartaa inalugalinnik pitsaassusigissunik peqarluartoq, taakkulu Asiami piumaneqarluartuusut, Susanne Arfelt Rajamand oqarpoq.
Sanngiilliornannginneruneq
Susanne Arfelt Rajamandip erseqqissarpaa Royal Greenlandimut pingaaruteqartoq niuernerup siammarternissaa, taamaalilluni aalisakkat nalinginnaasut soorlu raajat qalerallillu, Namminersorlutik Oqartussat ingerlatseqatigiiffiutaata isertitaanut pingaarnerusut, tuniniarneqarnerat akiilu niueqatigiinnermi tatineqaraangata suliffeqarfik isertitatigut sunnerneqarpallaarunnaarniassammat.