Inatsisartuni angallanneq pillugu oqallinnissarsuaq
Immatigut silaannakkullu angallaneq pillugu siunnersuutit assigiinngitsut tallimat.
Borgmesterit innuttaasullu nalinginnaasut amerlasuut Kalallit Nunaanni attaveqaateqarnikkut pitsaasumik ingerlanissamik isumalluuteqartut qularnanngitsumik ualeru inatsisartut ataatsimiittarfianniit KNR aallakaatitsilerpat tusarnaarratissagunarput.
Inatsisartut ullumikkut angallannermut tunngasunik oqallissuaassapput, tassani angallanneq pillugu siunnersuutit assigiingitsut tallimat oqaluuserineqassagamik.
Oqallinnermi qulaarneqarsinnaassaaq illoqarfiit sorliit nutaanik mittarfittaassanersut imaluunniit pioreersunik talliliivigineqassanersut, aammalu illoqarfiit sorliit suli qulimiguulimmik tikinneqartassanersut.
Ineqarnermut attaveqaateqarnermullu naalakersuisup Kim Kielsenip, Siumut, Ilulissani mittarfiup 1.799 meterinut tallineqarnissaa aammalu Nuummi mittarfiup minnerpaamik 1.799 meterinut ajornanngippallu 2.200 meterinut tallineqarnissaa pillugu siunnersuummik 2008-mi upernaakkut saqqummiussinissaminut akuerineqarnissani kissaatigaa.
Sikumukkormiut siunnersuutigaat, Qaqortoq nunap immikkoortortaani mittarfittaartinneqassasoq. Tamanna Narsami akerlerineqarpoq, siunenrsuut piviusunngussappat Narsarsuarmi mittarfik matuneqarsinnaassammat.
Marie Fleischer, Demokratit, Qaanaami Uummannamilu mittarfiit matuneqarnissaat siunnersuutigaa, taakku taakkunani innuttaasunut naammaginartumik ingerlannginnerat pissutigalugu.
Atassutikkormiut siunnersuutigaat, umiarsuakkut angallannerup ajorseriarsimaneranut tunngatillugu iluarsiiniarnissaq siunertaralugu angallannermut ingerlatseqatigiiffiit ataatsimeeqatigineqassasut.
Josef Motzfeldtip, Inuit Ataqatigiit, piumasaqaatigaa, timisartumut ilaasunik angallassineq timmisartukkullu assartuineq - Open Sky-imik taaneqartartoq - islandmiut naalakkersuisuinit naalakkersuissutsinnillu piaarnerpaamik atuutilernissaa pillugu Islandip Kalallit Nunaatalu akornanni isumaqatigiissut atsirneqartariaqartoq.