Politikki
Inatsisartuni ullumikkut pisussat
2016-imi upernaakkut ataatsimiinnerit naggataavisa pingajuanni politikerit pingasunngornermi oqallisissapput
Inatsisartuni siunnersuuterpassuit suliarineqassammata, ullumikkut pingasunngorneq ulloq takissaaq.
Naalakkersuisut politikkikkut aningaasaqarnermut nalunaarutaat oqallisigineqassaaq, aammalu Randi Vestergaard Evaldsenip (D) attassisinnaanermut siuariartornermullu pilersaarutaanik taasamik oqallisiginnittoqassaaq.
Naalakkersuisumik apeqqarissaarneq
Inatsisartuni siunnersuutit ullumikkut aamma kalaallinut kalaallisut oqaluttunut imaluunniit innuttaasut najugaqavissut atorfininnerminnut aammalu siulersuisunut toqqaanermut atatillugu salliutinneqartarnissaannut imaluunniit immikkut ajunngitsumik pineqartarnissaannut tunngassapput.
Siullermilli Atassummeersoq Knud Kristiansen, ineqarnermut, sanaartornermut aamma attaveqarnermut naalakkersuisuusoq apeqqqarissaarfigineqassaaq.
Taassuma kingorna Inatsisartut suliffitsik oqaluuserilaassavaat, taakku 2015-imili aaqqiivigineqalaarnikuupput.
Allannguut utertinniaraat
Aaqqiissuteqarnissamik kissaatigineqarnikuuvoq, oqallittarfimmi oqallinnerit sukkatsiimineqarnissaat, amerlasuutigut takisarmata uteqattaariffiungaatsiarlutillu.
Malittarisassalli nutaat ilaat siunertaatut atuutinngillat, taamaattumillu atorunnaaqqinnissaat siunnersuutigineqarpoq.
Vivian Motzfeldtimit (S) aalajangiiffissatut siunnersuut, ingerlatseqatigiiffiit Namminersorlutik Oqartussanit pigineqartut kikkut atorfinitsittassaneraannut tunngasoq suliarineqassaaq.
Kalaallisut salliutinneqartassaaq
Suliffeqarfinni taakkunani siunissami kalaallisut oqaatsinut aamma kulturimut ilisimasanut annertunerusumik piumasaqaateqartoqartalernissaa, taassuma siunnersuutigaa.
Taanna siunnersuut amerlanerussuteqartunit taperserneqarpoq, inuiaqatigiinni assigiinngisitsinermut aamma ikinnerussuteqartunut illersuinermut piumasaqaatitalerlugu.
Per Rosing-Petersenip (PN) avataaneersunik sulisoqartarnermut malittarisassat sukaterneqarnissaant siunnersuutaa ullumikkut aappassaaneerneqassaaq. Naalakkersuisut tassani naatsorsuutigaat, politikerit kissaataasa ilaannik tulluarsaallutik ilanngussiniarlutik, siunissami qinnuteqarnerit erseqqissumik tunngavilersorneri aqunnerussallugit.
Nakorsiartut najugaannut tapiineq
Sammisami aamma tassani Suka Frederiksenip (S) Namminersorlutik Oqartussat suliffeqarfiutaanni siulersuisuni ilaasortat, minnerpaamik affaat Nunatsinni najugaqartuunissaannut siunnersuuta aappassaaneerneqassaaq. Maannakkorpiaq siulersuisunut ilaasortat katinnerini amerlanerusut maani najugaqartuupput.
Peqqissutsimut tunngasuni Mimi Karlsenip (IA), nakorsiartunut ukiuni arlalinni Københavnimiittariaqartunut, najukkanik sanaartortoqarnissaanik periarfissanik misissuisoqarnissaanut siunnersuutaa aamma taperserneqarpoq.
Taavalu aamma Hans Enoksenip ‘Nunatsinni sulisinnaasut tamarmik atorneqalernissaat anguniarlugu, kalaallinik atorfilinnik qaffakkiartortitsinissamik anguniaqartumik, atorfilinnik pikkorissaasanerup kalaallinut iluaqutaanerusumik aaqqissuunneqarnissaanik’ siunnersuutaa oqallisigineqassaaq.