Inatsisartut aalajangiipput: Erngup nukinganik nukissiorfiup allilerneqarnissaanik suliaq ingerlatiinnarneqassasoq
Nutaamik misissueqqissaartoqassaaq aamma kingusinnerpaamik 2023-mi Naalakkersuisut Tasiilami erngup nukinganik nukissiorfiup qanoq allilerneqarnissaanut qanorlu akilerneqarnissaanut pilersaarummik saqqummiussisssasut, ataatsimiititaliamit siunnersuutigineqarpoq.
Inatsisartut upernaakkut ataatsimiinneranni Tasiilami erngup nukinganik nukissiorfik pillugu marlunnik siunnersuuteqartoqarsimavoq.
Siunnersuutini anguniarneqarpoq, illoqarfimmut innaallagissamik pilersuineq siunissamilu inuussutissarsiutitigut periarfissat eqqarsaatigalugit nukissiorfiup allilerneqarnissaa.
Naalakkersuisut aallaqqaammut allannguutissatut siunnersuuteqaraluarput, tassani piumasarineqarluni alliliinerup inuiaqatigiit aningaasaqarnerannut kingunerisinnaasaannik misissueqqittoqarnissaa.
Allannguutissatut siunnersuuteqartoqarmat, Sanaartornermut Ataatsimiititaliamit naalakkersuisoq isumasioqatigineqarsimavoq.
Naalakkersuisut siunnersuutaat itigartinneqartoq
Isumasioqatigiinneq ataatsimiititaliami ilaasortanut toqqissisitsisimanngilaq, ataatsimiititaliamimmi Naalakkersuisut siunnersuutaat ilalerneqanngilaq, ataatsimiititaliarlu tassunga taarsiullugu allannguutissatut siunnersuuteqarluni, siunnersuut Inatsisartunit akuerineqarpoq.
Siunnersuummi pineqarpoq, Naalakkersuisut erngup nukinganik nukissiorfiup allilerneqarnissaanik sulissuteqarnissaat.
Ataatsimiititaliap sulineq immikkoortunut pingasunut avillugu ingerlanneqassasoq siunnersuutigaa:
- Naalakkersuisut inuiaqatigiit aningaasaqarnerinut sunniutissanik naliliinerit inernerinik kingusinnerpaamik ukiakkut ataatsimiinnermi saqqummiussissasut.
- Naalakkersuisut suliniutissamut, sanaartornissamut aningaasalersuinissallu ingerlanneqarnissaanut siunnersuuteqassasut - innaallagissiorfiup allilerneqarnissaanut innaallagissap illoqarfimmut aqqutaanik nutaamik pilersitsisoqssaaq.
- Naalakkersuisut suliniutip ingerlanneqarnissaanut siunnersuummik kingusinnerpaamik 2023-mi ukiakkut ataatsimiinnermi saqqummiussisasut.
Juullimi innaallagissap qameqattaarnera qattussimagaa
Lars Poulsen (S) politikkerit siunnersuuteqarsimasut ilagaat, taassumalu ataatsimiititaliap suliamik suliarinnissimanera naammagisimaarluinnarpaa:
- Siunnersuutip Inatsisartuni amerlanerussuteqartunit taperserneqarnera nuannaarutigaara. Siunnersuutip matuma akuerineqarneratigut, Tasiilami inuussutissarsiutitigut periarfissat ammaanneqarput, politikkeri tamatuma ullumikkut ajornartorsiutaasunut qaangiissutaasinnaaneranik aamma siulittuisimasoq oqarpoq:
- Pingaartumik juullimi innaallagissap qameqattaarnera qattussimavarput, Lars Poulsen oqarpoq.
Kan ikke lånefinansieres
Naalakkersuisoq Kalistat Lund aamma oqaluttarfimmiit oqaaseqarpoq, tassanilu erseqqissaassutigivaa, suliniutip naammassineqarnissaanut aningaasanik aningaasanut inatsimmit nassaarniartoqartariaqassasoq.
Maannamut misissuisarsimanerit takutissimavaat, innaallagissiorfiup allilerneqarnera inuiaqatigiit aningaasaqarnerannut iluaqutaassanngitsoq - taamaammallu missingersuusiortarnermut naatsorsuusiortarnermullu inatsit malillugu Namminersorlutik Oqartussat taarsigassarsiniarsinnaanatik.
Tassunga taarsiullugu suliniutit allat assigalugit, suliniummut aningaasassat aningaasanut inatsisissamik isumaqatiginninniarnermut ilanngunneqartariaqarlutik, apeqqutaaginnarporlu aningaasanut inatsimmit 55 millioner koruunit missaanniittunik nassaarniarnermi politikkerit isumaqatigiissinnaassanersut.