Inatsisartut akikinnerulerput
Inatsisartut 2010-mi ingerlannerat 39,9 miliuuni koruuninik akeqarpoq
Taamaalilluni Inatsisartut ingerlanerat 2009-mut saniliullugu 6 miliuuni koruuninik akikilleriarpoq. Inatsisartut 2010-mi ukiumut naatsorsuutaanni tamanna auarneqarsinnaavoq.
Sipaakkat 6 miliuuni koruunit sipaarneqarsinaasimapput, siniisussanut akigitinneqartut 2008-mut 2009-mullu sanilliullugit 3 miliuuni koruunit missaannik ikileriarsimanerat. 2010-mi 106.000 koruunit sinniisunut atorneqarsimapput.
Aningaasarsianut ajunngitsorsiassanullu akiliutit ikileriarsimapput. Taakkua 2009-miit 5 miliuuni koruuninik ikileriarsimallutik, taamaasillutik siorna aningaasartuutit 20,7 miliuuni koruuniupput, tamana KNR-imit oqaatigineqarpoq. Tunissutinut "ilassinninnerlu" aningaasartuutit aamma ikileriarsimapput.
Siumukkormiut angalaneq nuannareqaat
Inatsisartut ukiumut naatsorsuutaanni aamma atuarneqarsinnaavoq, politikerit angalaneri katillutik 3,3 miliuuni koruuninik akeqarsimasut - tassa ukiumut siulianut sanilliullugu 500.000 koruuninik amerlanerullutik.
Inatsisartunut ilaasortat angalanerpaat tassa Siumukkormiut, taakkua qaammatit aqqaneq marluk ingerlaneranni angalanerat 430.000 koruuninik akeqarpoq. Partiimut ilaasortap Akitsinnguaq Olsen-ip angalasarneri 88.940 koruuninik akileraartartut akilerpaat.
Atuinikinerpaat tassa Demokraatit, taakkua 46.000 koruuniinnaat 2010-mi angalanerminnut atorsimavaat, tassungali ilanngullugu oqaatigisariaqarpoq soorlu Siumukkunnut sanilliullutik Inatsisartunut ilaasortaatitaasa ikinerunerat.
Politikkikkut ataatsimiititat akornani Inuussutissarsiutinut ataatsimiititaq atuinerpaalluni 250.000 koruuninik atuisimavoq massa ataatsimiititat allat sisamat koruunimik ataasinnguamilluunniit atuisimanngitsut.