Inatsisartut: Asii aningaasaqarnermut akileraartarnermullu ataatsimiititaliami siulittaasunngorpoq

Inatsisartut ataatsimiititalianut agguaassimalereerput. IA sinnerlugu Inatsisartuni ilaasortaq Asii Chemnitz Narup Inatsisartut ataatsimiititaliaani pissaaneqarnerpaami aningaasaqarnermut ataatsimiititaliaq, Hans Peter Poulsen taarserlugu siulittaasunngorpoq.

Asii Chemnitz Narup (IA) Inatsisartut aningaasaqarnermut akileraartarnermullu ataatsimiititaliaani siulittaasunngorpoq. Taanna siusinnerusukkut aningaasaqarnermut naalakkersuisuusimavoq aammalu Kommuneqarfik Sermersuumi borgmesteriunerminut atatillugu kommunip aningaasaqarnermut ataatsimiititaliaani siulittaasuunikuulluni.

Leiff Josefsen

Jensine Berthelsen

Published 28 September 2023 - 12:12

Annonse

Pingasunngornermi Inatsisartut ataatsimiititalianut ilaasortaaffissaminnut inississorput. Naalakkersuisuni nikittoqangaatsiarnera ataatsimiititaliat katitigaanerannut allanngortitsivoq.

Ataatsimiititaliani siulittaasut:

Qinigaanerup Misilinneqarnissaanut Ataatsimiititaliaq:
Mariia Simonsen (IA)

Inatsisinut Ataatsimiititaliaq:
Anders Olsen (S)

Aningaasaqarnermut Akileraartarnermullu Ataatsimiititaliaq:
Asii Chemnitz Narup (IA)

Nunanut Allanut Sillimaniarnermullu Ataatsimiititaliaq:
Mariane Paviasen (IA

Kukkunersiuinermut Ataatsimiititaliaq:
Mariia Simonsen (IA)

Aalisarnermut, Piniarnermut Nunalerinermullu Ataatsimiititaliaq:
Kristian Jeremiassen (IA)

Inuussutissarsiornermut Aatsitassanullu Ataatsimiititaliaq:
Karl Tobiassen (S)

Ilaqutariinnermut Peqqissutsimullu Ataatsimiititaliaq:
Mala Høy Kúko (S)

Kultureqarnermut, Ilinniartitaanermut Ilisimatusarnermut Ilageeqarnermullu Ataatsimiititaliaq:
Najaaraq Møller (S)

Sanaartornermut Ataatsimiititaliaq:
Kristian Jeremiassen (IA)

Eqqissisimatitsinermut Avatangiisinullu Ataatsimiititaliaq:
Mala Høy Kúko (S)

Naalakkersuisooqatigiit Inatsisartuni ilaasortaatitai siulittaasuuffiit tamaasa inuttalersorpaat illuatungiliuttullu partiivisa siulittaasup tulliata issiavii tamaasa inuttalersorlugit.

Aningaasaqarnermut akileraartarnermullu ataatsimiititaliami siulittaasunngorpoq Asii Chemnitz Narup (IA). Taanna siusinnerusukkut aningaasaqarnermut naalakkersuisuusimavoq aammalu Kommuneqarfik Sermersuumi borgmesteriunermini kommunalbestyrelsip aningaasaqarnermut ataatsimiititaliaani siulittaasuunikuulluni.

IA´p qinigaalluartitaasa ilaat Narsameersoq, Marianne Paviassen, nunanut allanut sillimaniarnermullu ataatsimiititaliami siulittaasunngorpoq. Taanna piffissami sivisunngitsumi qinikkatut sulisimagaluarluni Inatsisartuni misilittagaqarlualereerpoq, qinigaaffiup siuliani sinniisussatut Inatsisartuniippoq maannalu nammineq qinerneqarluarnermigut Inatsisartuni ilaasortaviulluni. Piffissap sivikitsup taassuma iluani aamma ilaatigut Nunanut allanut naalakkersuisutut misilittagaqarpoq.

Ilisimaneqartutut Hans Aronsen IA-meersoq tamakkiisumik Inatsisartuni ilaasortanngornikuuvoq, taannali napparsimalluni sulinngiffeqarmat peqqisseqqinnissaata tungaanut Mariia Simonsen 10. novemberip tungaanut Inatsisartunut aggersagaanikuuvoq suliaanillu paarsilluni.

Kristian Jeremiassen (IA) aalisarnermut, piniarnermut nunalerinermullu ataatsimiititaliami siulittaasunngorpoq, ataatsimiititaliamilu tassani aalisarnermut piniarnermullu naalakkersuisutut tunuaqqammertoq, Karl Tobiassen (S) ataatsimiititaliami ilaasortatut inissippoq.

27. septemberimi ataatsimiititaliani inississornerit tamaaasa UANI qimerloorsinnaavatit.