ilinniartitaaneq
Inatsisartut: Danmarkimi kalaallinut kollegieliortoqarli
Inatsisartuni amerlanerussuteqartut Naalakkersuisut pequniarpaat Danmarkimi kollegialiornissamik piareersaasioqqullugit
Siumut, Inuit Ataqatigiit, Atassut aamma Demokraatit Danmarkimi kalaallit ilinniagaqartut kollegialiuunneqarnissaannik siunnersuut taperserpaat. Partii Inuit akerliupput Danmarkimilu ilinniartitaanermut aningaasartuutit paasisaqarfigerusullugit.
Siumup aamma Atassutip Inatsisartuni gruppii siunnersuummik saqqummiussaqartuupput.
Kalaallit ilinniagaqartut Aalborgimi, Aarhusimi Odensemilu Kalaallit Illuutaanni najugaqarsinnaasarput. Kalaalilli ilinniartut Københavnimiittut qallunaat ilinniartorpassuit assigalugit Københavnimi kollegiani inissaaleqinermit eqqugaasarput.
Siunertaqanngitsumut aningaasartuutit
Siunnersuut Siumup, Atassutip, Inuit Ataqatigiit aamma Demokraatit ilalerpaat. Suliniutit suliarinerani suleqatissarsiornissaq inassutigineqarpoq.
- Kollegialiorniarnermi suleqateqarnissaq Naalakkersuisunut inassutigiumavarput. Assersuutigalugumi Kalaallit Peqqissartut Angerlarsimaffiliornikuuvugut savalimmiormiut suleqatigalugit, taamaalilluta aningaasartuutit millisarsinnaallugit ulluinnarnilu ikioqatigiissinnaanngorlugit. Suleqatigiissinnaanerup aningaasartuuteqatigiissinnaanerullu periarfissaq pitsaanerulersissagaa Inuit Ataqatigiit isumaqarput, Inuit Ataqatigiit sinnerlugit oqaaseqartoq Mimi Karlsen oqarpoq.
Danmarkimi kalaallit ilinniagaqartut kollegialiuunneqarnissaannik siunnersuut Partii Inuit isumaqatiginngilaat. Taakku innersuussutigaat kalaallit Danmarkimi ilinnialersut 100-juugaangata taakkunannga 70-it Nunatsinnut uterneq ajortut.
- Tassunga atasumik Partii Inuit Naalakkersuisunut apeqqutigissavarput, Danmarkimut
ilinniariartarneq ataatsimut isigalugu qanoq naleqarnersoq. Tassuunakkut aningaasat siunertaqanngitsumik aningaasat atukkagut qanoq amerlatiginersut takusinnaanngorumallutigu, Partii Inuit sinnerlugit Randi Broberg oqarpoq piumasaralugulu ilisimatitsissutigineqassasoq ilinniartitaaneq qanoq iliornikkut pissarsissutaanerusalersinnaanersoq.
Siunnersuut Naalakkersuisut ilalerpaat.
Partii piumasaat suliniut Nunatsinni kollegialiortitermut kinguarsaataassanngitsoq. Siunnersuut juunip pingajuani aappassaannerlugu suliarineqassaaq.