- Inatsisartut ilaqutariittut inuunermut tulluarnerusariaqarput
IA-meersoq Juliane Henningsen Inatsisartuni inuusuttunik amerlanernik ujartuivoq. Taanna naapertorlugu inuusuttut kajungilersinneqarsinnaapput Inatsisartuni ataatsimiittarnerit ukiumut pingasunik sisamanilluunniit amerlassuseqalersinnerisigut
- Inuiaqatigiinni inuusuttoqarpoq, utoqqasaaqarluni utoqqaqarlunilu. Taamaattumik politikkimi inuusuttoqarnissaa nunamut pingaaruteqarpoq. Inuusuttut Inatsisartunut qinersinissamut sassaqqullugit kaammattorusuppakka, allaanerussuteqarnissamullu suleriaasitoqaq pisoqalisimasoq unissutigeqqunagu.
Taama Inuit Ataqatigiit sinnerlugit Inatsisartunut ilaasortaq Juliane Henningsen Sermitsiaq.AG-mut oqarpoq.
Inuusuttorpassuarnik erseqqissunik isumalinnik naapitaqartarsimavoq, taakkuali Inatsisartunut sassarusuttanngillat ilaqutsiulereersimagamik ilaquttatillu qimakkusunnginnamikkik.
Taamaattumik Inatsisartuni ataatsimiittarnerit amerlassusaat Henningsenip allanngortikkusuppaa.
Ataatsimiinnerit pingasut sisamalluunniit
- Isumaqarpunga Inatsisartuni ataatsimiittarnerit ukiumut marlunnut taarsiullugu pingasunut sisamanulluunniit agguataarneqaraluarpata tamanna tamanut iluaqutaassagaluartoq. Taamaalillutik ilaqutaqalersimasut ullumikkutut taama sivisutigisumik ilaquttatik qimassimasariaarutissavaat. Ullumikkut pissutsit taamaatsillugit ilaqutariittut inooqatigiinnissaq ajornarluinnangajappoq, Juliane Henningsen oqarpoq.
Taanna oqaluttuarpoq ataatsimeeriaatsip allanngortinneqarnissaa pillugu Inatsisartunut ilaasortat allat oqaloqatigisarsimallugit.
Juliane Henningsenip Inatsisartuni Aningaasaqarnermut Ataatsimiititaliamut ilaasortaanini taamaatiinnartariaqalersimavaa marlunnik meeraqarami, aningaasaqarnermullu ataatsimiititaliami ulloq suliffiusoq nalunaaqutaq ullaakkut qulingiluaniit unnukkut aqqanernut sivisussuseqarsinnaasarmat.
- Taamaattariaqanngikkaluarpoq, Juliane Henningsen, marsip aqqaneq-aappaani qinersinissamut qinigassanngorteqqittoq, oqarpoq.