Inatsisartut Knud Mathiassenip unnerluutigineqarsinnaannginnera atorunnaarsippaa
Inatsisartut tallimanngornermi ualikkut Inatsisartunut ilaasortap Knud Mathiassenip (IA) qinikkatut unnerluutigineqarsinnaannginnera atorunnaarsippaat, Agathe Fontain (IA) uppernarsaavoq.
Aap, Agathe Fontain (IA) naatsumik taama akissuteqarpoq.
Inatsisartunut ilaasortap Knud Mathiassenip (IA) qinikkatut unnerluutigineqarsinnaannginnera Inatsisartut atorunnaarsippaat. Tamanna upernaakkut ataatsimiinnermi tallimanngornermi ualikkut matoqqasumik ataatsimiittoqarnerani pivoq – maannakkullu eqqartuunneqarsinnaalerneranik tamanna isumaqarpoq.
Agathe Fontainip inummut tunngasuummat, Knud Mathiassenip unnerluunneqarsinnaannginneranik atorunnaarsitsinermut suna pissutaanersoq politikerip oqaatigisinnaannginnerarpaa.
Kisianni oqaluttuarpoq:
- Suliat tamarmik politikerip unnerluutigineqarsinnaannginneranik politiit kissaateqarfigisaat ilungersunartuupput – sumut tunnganeri apeqqutaanatik.
Piffissap takutissavaa
Knud Mathiassenip partiimit anisitaanissaanut IA pilersaaruteqarnersoq pillugu apeqqummut, IA malittarisassaqartoq taanna akissuteqarpoq:
- Najukkami immikkoortortaqarfiup siulersuisuunerit qinnuigisussaavaat, tassunga killikkumaarnerluta piffissap takutikkumaarpaa. Suli oqaluuserinninngilagut, taanna oqarpoq.
Sermitsiaq.AG suliami pineqartumit Knud Mathiassenimit oqaaseqartitsiniaraluarpoq. Taarsiullugu Facebookimi allatamut innersuussivoq.
Tassani suna pillugu eqqartuunneqarnissani oqaluttuarinngilaa, taamaattorli pinngitsuunerarpoq.
- Katsorsartinnera peqqutigalugu maanna sulinngiffeqarpunga . Katsorsartinninnili oqaaseqarusunngilanga. Suliartoruma tusass, Knud Mathiassen allappoq.