Inatsisartut sapaatip akunnera una ataatsimiissanngillat
Naalakkersuisut siulittaasuata qinnuteqarnera malillugu Inatsisartuni sapaatip akunnerani matumani ataatsimiinnissat tamarmik kinguartinneqarput. Qitiusumik allaffeqarfimmi qarasaasiaqarnikkut isumannaallisaanikkut ajutoortoqarsimanera tunngavilersuutigineqarpoq.
Inatsisartut sapaatip akunnerani ataatsimi ataatsimiittareerlutik ataatsimiinngiffeqartariaqalerput.
Suliassat oqaluuserisassanngortinneqarsimasut eqqarsaatigalugit paasissutissanik attuumassutilinnik tamanik Inatsisartut pissarsisinnaanissaata qularnaarneqarnissaa eqqarsaatigalugu Naalakkersuisut ajornartorsiuteqarput.
Inatsisartut ataatsimiinnissaat sapaatip akunnerata tullianut kinguartinneqassasut, Naalakkersuisut Siulittaasuata Inatsisartuni siulittaasoqarfimmut qinnutigaa. Qinnuteqaallu Inatsisartuni siulittaasoqarfiup akueraa.
Naalakkersuisoqarfimmi qarasaasiakkut sillimaniarnikkut ajutoortoqarsimanera unammillernartuusoq nassuiaatigineqarpoq.
Ataatsimiititaliani sulineq aamma eqqorneqartoq
Inatsisartut siulittaasoqarfia tusagassiorfinnut nalunaaruteqarluni nassuiaavoq ataatsimiinnerit kinguartinneqarnerat, upernaakkut ataatsimiinnermik sivitsuinissamik kinguneqassasoq.
- Siulittaasoqarfiup sapaatip akunnerata aggersup ingerlanerani upernaakkut ataatsimiinnermut oqaluuserisassat naleqqussassavai upernaakkullu ataatsimiinnerup sapaatip akunnera 22 ilanngullugu sivitsorneqarnissaa naatsorsuutigineqartariaqarluni, siulittaasoqarfik allappoq.
Inatsisartuni ataatsimiititaliani sulinerit qarasaasiakkut sillimaniarnikkut ajutoortoqarneranit eqqorneqarnissaat siulittaasoqarfiup naatsorsuutigaa. Ullut ataatsimiiffissat nutarterneqarnerat inatsisartuni siulittaasoqarfiup sapaatip akunnerani matumani nalunaarutigissavaa.