Inatsisartut sapaatip-akunnerani matumani oqaluuserisassaat
Inatsisartut sapaatip-akunnerani matumani Inatsisartunut aalajangiiffigisassanngortitat arlallit aappassaanik suliaralugillu Naalakkersuisut inatsisissatut siunnersuutaasa ilaat pingajussaanik suliarissavaaat. Aamma Aningaasaqarnikkut Ingerlatsineq pillugu Nlunaarut Nunattalu Karsiata naatsorsuutai saqqummiunneqassapput.
Inatsisartut upernaakkut ataatsimiinneranni sapaatip-akunnera kingulleq aallartippoq.
Oqaluuserisassallu Inatsisartunit isummerfigineqartussat soqutiginartunik ulikkaarput. Oqaluuserisassani pingaartumik Inatsisartunut aalajangiiffigisassanngortitat aappassaaneerneqarnissaat aamma Naalakkersuisut inatsisissatut siunnersuutaasa pingajussaaneerneqarnissaat pisussaapput, aammali Inatsisartuni ilaasortat apeqquteqaatit tunngavigalugit oqallittussaapput, 2022-mut Aningaasaqarnikkut Ingerlatsineq pillugu Nalunaarut kiisalu 2021-mu Nunatta Karsiata naatsorsuutai saqqummiunneqassallutik.
Marlunngornermi qilalukkat qernertat nipinut illersorneqarnissaannut periarfissat oqaluuserineqassapput. Jens Napaattuup (NS) siunnersuutigisimavaa, Qilalukkat nipinut illersorneqarnissaat siunertaralugu kangerlunni qaqortat qernertallu sivisunerusumik najortagaanni angallatit aalajangersimasut ingerlaartarnerisa killilerneqarsinnaaneranut periarfissat misissoqqullugit Naalakkersuisut peqquneqarnissaannik Inatsisartut aalajangiiffigisassaattut siunnersuut.
Anna Wangenheimip aamma paaserusussimavaa, peqqinnissaqarfimmi sulisut napparsimasunut innuttaasunullu toqqaannartumik attaveqarnermut atorneqarsinnaaqqullugit, innuttaasut peqqinnissaqarfimmi imminnut sullissinnaanerat imminut akilersinnaanersoq Naalakkersuisut misissuinissammut peqquneqarsinnaanersut, tassani sulisut nakorsaatinik nutarterisarnermut nakorsaatinillu tunniussisarnermut atorunnaarsinneqarnissaat siunertaralugu.
Aningaasaqarnermik Ingerlatsineq pillugu Nalunaarut apeqqarissaarnerlu
2022-mut Aningaasaqarnermik Ingerlatsineq pillugu Nlunaarut marlunngornermi maajip 31-ani Inatsisartunut saqqummiunneqassaaq. Aamma Inatsisartut siorna Nunatta Karsiata naatsorsuutai siullermeerlugit suliarissavaat. Oqaluuserisassani takuneqarsinnaavoq, Nunatta Karsiata naatsorsuutai ukiakkut ataatsimiinnermi aappassaaneerlugit suliarineqassasut.
Pingasunngornermi ataatsimiinneq aallarnerlugu Naalakkersuisut Siulittaasuat Múte B. Egede apeqqarissaarfigineqassaaq.
Ullormi suliassat nangillugit oqaluffinni organistinik amigaateqarnermut suna pissutaanersoq pillugu Naalakkersuisut misissuinissaannik Atassummeersup Sivet K. Heilmannip kissaataat oqaluuserineqarlunilu Siumumeersup Doris J. Jensenip Oqaatsuni oqaluffimmik nutaamik Naalakkersuisut sanaartoqqusinissaannik kissaateqarsimanera oqaluuserineqassaaq.
Aamma Jens-Frederik Nielsenip akileraarutitigut oqilisaassisoqarnissaanik aalajangiiffigisassatut siunnersuutaa pingasunngornermi oqaluuserineqassaaq.
Tullissaanik ataatsimiinnissap aallartiffissaa ullulerneqassasoq
Nappaatit tunillaassortut akiorniarlugit iliuusissatut siunnersuut, nunarsuarmi tuniluuttoqarnerani killilersuutaasinnaasunik imalik marlunngornermi maajip 31-ani aappassaaneerlugu suliarineqassaaq upernaakku ataatsimiinnerup ulluani kingullermi juunip aappaani pingajussaaneerlugu suliarineqassalluni.
Tamakkua saniatigut nassuiaatit marluk Inatsisartuni ilaasortat suliaritikkumasimasaat sisamanngornermi juunip aappaani naammassillugit suliarineqarlutillu taasissutigineqassapput. Tassani pineqarput, spiralilersuisimanermik Naleqqamit nassuiaateqaqqusisimaneq aamma Doris J. Jensenip Kalaallit Nunaata nunasiaataajunnaariartorneraqnik Naalakkersuisunut nassuiaasioqqusisimanera oqaluuserineqassallutik.
Apeqquteqaatit aallaavigalugit oqallisissiani ulluinnarni pisiniarfinni immikut imigassaarniarfeqalersinnaaneq partillu Nunatsinni sakkulersortoqannginnissaanut isumaat aamma sammineqassallutik.
Upernaakkut ataatsimiinneq naggaserlugu ukiamut ulloq ataatsimiiffissaq siulleq Inatsisartuni ilaasortanit ullulerneqassaaq.