Inatsisartut sulilerput

Tamat ornittagaanni pujortaqqusiunnaarnissaq, qimminik nukittuunik eqqusseqqusiunnaarnissaq kiisalu timersornermi aqutsisut meeqqanut eqqunngitsuliorsimasut inerteqqutaalernissaa tassaapput tallimanngornermi apriilip 9-ani Inatsisartut upernaakkut ataatsimiilerunik oqaluuserisassaat.

Tamarmilli inerteqqutinut tunnganngillat: Inatsisartuni ilaasortat 31-t ilaatigut oqaluuserissavaat oqaatsinut politikki, nuna tamakkerlugu naligiissitaanerup ullua, kiisalu Nuuk Imiup puiaasanik atuineranut maleruassat qasukkarnerat, taamaalilluta coca-cola-mik qillertuusamiittumik pisiniarsinnaalissalluta.

2010-mi upernaakkut ataatsimiinneq arlalitsigut soqutiginaaneqarpoq, peqqutigalugu 2009-mi Inatsisartut ukiuat eqqumiimmat. Upernaakkut ataatsimiinnissaq taamaatiinnarneqarpoq qinersisoqarnissaa peqqutigalugu, juunimilu immikkut ittumik katersuunnermi Naalakkersuisut nutaat ivertinneqarput, taakkuli ukiakkut ataatsimiinermi malunnaateqarluarnissaminnik periarfissaqarpallaarsimanngillat. Maannakkut pissutsit nikinneranniit qaammatit qulingiluat ingerlasimalerput, Kuupik Kleistillu peqataasalu naalakersuisooqatigiit nammineq poltikilat oqaluuseritittussanngorpaat.

Inatsisartut siulittaasoqarfiata upernaakkut ataatsimiinnermi ulluni 17-ini tallimanngornermi apriilip 9-aniit pingasunngornermi maajip 19-ianut katersuunnermi oqaluuserisassat saqqummiuteqqamerpai.

Naalakkersuisut 42-nik siunnersuuteqarput, Inatsisartunilu ilaasortat 43-nik siunnersuuteqarlutik. Ukiakkut ataatsimiinnermi siunnersuutit 13-it siullermeerneqarput, upernaakkulu ataatsimiinnissamut ingerlateqqinneqarlutik. Taamaalilluni oqaluuserisassat immikkoortui 103-upput.

Qimerluulaaraanni takuneqarsinnavoq ilinniartitaaneq (imm. qulit), aalisarneq piniarnerlu (imm.qulit), inuussutissarsiorneq (imm. 9), meeqqat inuusuttullu (imm. 7) peqqinneq pinaveersaartitsinerlu (imm.7) ineqarneq (imm.59, ilaqutariit (imm. 5) aamma kulturi oqaatsillu (imm. pingasut) upernaakkut ataatsimiinnermi qulequtarineqassasut.