Inatsisiliorneq pipallataq
Inatsisartuni ataatsimiinnerit sivikitsut ulapaarfioqisullu inatsisiliornermi pipallataarisoornissamut qaninnerulersitsipput, Inatsisinut ataatsimiitsitaliami illuatungiliuttut oqarput.
Inatsisissatut siunnersuutit ullormullu oqaluuserisassat amerligaluttuinnartut atorfilittanut nutserisunullu atuipilutsitsineruvoq. Tamanna inatsisinik pilallataarisoqarsinnaaneranik kinguneqarsinnaavoq allaallumi Kalaallit Nunaanni demokratiimik navianartorsiortitsilersinnaalluni. Aaqqissutissaq tassaasariaqarpoq qallunaat foketingiattulli ataatsimiinnerit sivitsorneqarnissaat, Inuit Ataqatigiit Demikraatillu Inatsisinut ataatsimiitsitaliami ilaasortaatitaat, knr.gl naapertorlugu.
- Ullumikkut Ataatsimiittarnerit sivikippallaarput. Inatsisartuni atorfilittat nutserisullu sulipilutsittarpagut, qasusooqqajaalersittarlugit. Aaqqinniagassaq iliuuseqarfiginngikkutsigu inatsisinik pipallataarinermik kinguneqariaannaavoq. Assersuutissat kingullersaraat meeqqanit pissaarnermik annertunerusumik atuisinnaalernissamut siunnersuut. Siunnersuutit taamak ittut ajutoorutaarujussuarsinnaapput, Lene Knüppel knr.gl-imut oqarpoq.
IA-p ilaasortaatitaata Asii Chemnitz Narupip uparuarpaa suleriaatsip sukumiisumik nutarterneqarnissaa pisariaqartoq. Asii isumaqarpoq, Inatsisartut ullumikkut suliffiusoq kalaallit nunaanni inatsisiliornermi pimoorussilluni sulinissamut piffissakilliorfiiusoq.
– Taamaattumik suleriaatsit qallunaat foketingiata suleriaasianut assingusut atuutilersittariaqarpagut - allatut taallugu ataatsimiinnerit sivisunerusut ataqatigiissaarnerusullu. Aamma partiit allattoqarfii nukittorsartariaqarput. Tassa Inatsisartuni suleriaaseq sulianillu ingerlatseriaaseq sukumiisumik nutartertariaqarpoq. Assersuutigalugu sooruna qangalili isumasioqatigiiffiit ammasut atuutilersissimanngilagut? Asii Chemnitz aperivoq.