Inatsisinut Ataatsimiititaliaq ilisimasassarsiorluni angalasoq

Inatsisartut Inatsisinut Ataatsimiititaliaani ilaasortat, Anders Olsen (S), Iddimanngiiu Bianco (IA), Michael Rosing (D) aamma Laura Taunajik (S) Danmarkimut paasisassarsioriarlutik angalapput.

Politiit sulinerminnut atugassaannut Pinerluuteqarsimasunillu Isumaginnittoqarfimmut tunngavissiissutinut, kiisalu ataatsimiititaliap ilinniagaqarfinni ilinniartullu ineqarfiini ikiaroornartumik atuisoqarsimasinnaaneranut misissuiffiginnilluni misiliummik tigusiffiginnissinnaalernissamut Inatsisartut inatsisissaattut siunnersuummik suliaqarnerminut atatillugu ataatsimiititaliap paasissutissanik pissarsinissaa isumannaarniarlugu angalapput.

Ikiorteqartitsineq oqaluuserineqartoq
Angalaneq Københavnimi Kalaallit Illuutaannut pulaarnermik aallarnerneqarpoq – tassani toqqammavigisaqartitsinikkut suliaqarneq tusagaqarfigiumallugu.

Toqqammavigisaqartitsisut inunnut inissiisarfimmi tarnip pissusaanik ilisimasalinnit aqunneqartumut imaluunniit sivisussusiligaanngitsumik inissitassanngorlugit eqqartuussuteqartunut ikiortissatut toqqagaasarput, suliassaralugulu inissinneqarnerup tassanilu pillaatitut atugaritinneqartut pisarialik sinnerlugu sivisussuseqartannginnissaasa isumannaarnissaa.

Aaqqissuussaq Kalaallit Illuutaannit allaffissornikkut aqunneqarpoq.

Atuaruk: Naalakkersuisut hashimut misissortinnissaminnut piareersimasut

Ataatsimiititaliap tamatuma saniatigut Folketingip Ombudsmandia pulaarpaa, Ombudsmandip atuuffii, tassani aamma Kalaallit Nunaanni Ombudsmandimut taartaasartutut atuuffia, Ombudsmandip Kalaallit Nunaanni inissiisarfinnik unnuisitsisarfinnillu nakkutilliiartortarnera paasisaqarfiginiarlugu.

Paarnaarussivimmi pulaarneq
Ombudsmandip aamma oqaluttuaraa ikiaroornartumik atuisimasinnaanermut misiliummik tigusiffiginninnermut atatillugu ilinniarnertuunngorniamik ilinniagaqarfimmit qimagutsitsisimaneq pillugu Ombudsmandip isumaliusersuutai pillugit tusagaqarumalluni.

Inatsisartuni politikerit aamma Herstedvesterimut pulaarput, kalaallit pinerluuteqarsimasut arlallit tassani paarnaarussaaqqapput.

Pulaarneq kalaallinik inissinneqarsimasunik, ataatsimiititaliamik naapitsinissaminnik kissaateqarsimasunik ataatsimeeqateqarnermik naggaserneqarpoq.

- Ataatsimiinnermi Nuummi matoqqasumik inissiisarfissap pilersinneqarneranut atatillugu pissutsit isiginiarneqarnissaat pingaartitatik pineqaatissinneqarsimasut ersersippaat, Inatsisartut paasisissutissiisarfiat angalaneq pillugu ilaatigut allappoq.

Inuit pisinnaatitaaffii
Ataatsimiititaliap Rigspolitiit peqatigalugit nunatsinni politiit atugaat eqqartuiffigai, tassani inuttalersugaanikkut, illuuteqarnikkut atortulersugaanikkullu pissutsit isiginiarlugit.

Ataatsimiinneq pisoq nangillugulusooq nunatsinni Politimesterimik Bjørn Tegner Bayimik ukiamut ataatsimeeqateqarnissaq pillugu isumaqatigiittoqarpoq.

Ataatsimiititaliaq aamma inuit pisinnaatitaaffii pillugit ilisimatusarfimmi (Institut for Menneskerettigheder) Ilinniarfinni aamma ilinniagaqartut ineqarfiini aangajaarniutinik atuisoqartarnersoq pillugu misissuisoqartarnissaanut Inatsisartut inatsisissaattut siunnersuutip inuit pisinnaatitaffii eqqarsaatigalugit ajornartorsiutit nassatarisinnaasai pillugu paasissutissanik ataatsimiititaliaq pissarsivoq.

Atuaruk: Hashimut sakkortusaarnerulernissap tapernerneqarnera Demokraatit nuannaarutigaat