Inatsisitigut ataataqanngitsut danskit naalagaaffiat eqqartuussisunut sassaqquaat
Pingasunngornermi danskit naalagaaffiat Københavnip eqqartuussiviani sassaqqullugu nalunaarutigineqarpoq. Eqqartuussivikkut suliassanngortitsineq inatsisitigut ataataqanngitsut 26-t sinnerlugit pivoq, naalagaaffik inuttut pisinnaatitaaffiinik unioqqutitsisimasoq aamma ataataqarsinnaannginnerannik immikkoortitsisimasoq taakku isumaqarput.
Inatsisitigut ataataqanngitsut pillugit suliami pingasunngornermi eqqartuussivimmut suliassanngortitsisoqarpoq. KNR taama allaaserisaqarpoq.
Eqqartuussissuserisutut suliffeqarfik Ehmer Pramming, inatsisitigut ataataqanngitsunut suliamik ingerlatsisuusut, danskit naalagaaffiannik eqqartuussivimmut sassaqqusillutik aalajangerput.
- Københavns Byretimut sassaqqusinermik ullumikkut nalunaaruteqarpugut. Maanna eqqartuussivimmi suliamik aallartitsinitsinnik tamanna isumaqarpoq, Ehmer Prammingimi eqqartuussissuserisoq, Albert Gunnersen, Sermitsiaq.AG-mut taama oqarpoq.
Isumaginninnermut, utoqqarnut aamma ineqarnermut ministereqarfik sassaqquneqarpoq, maannalu allagaqarluni akissaqarnissamut periarfissaqalerpoq.
- Isumaqatiginninniarnermik aallartitserusunnersut imaluunniit sassartitsinitsinnut akisussaarusunnginnersut maanna takussavarput.
Sivisuumik suliarineqarsinnaasoq
Sassartitsineq eqqartuussiviup akueralugu ministereqarfimmut ingerlateqqippagu, akinissaminnut tunngaviusumik ullunik 14-inik periarfissaqassapput, kisianni piffissamut killigititaasoq sivitsussallugu qinnuteqarsinnaapput, Albert Gunnersen nassuiaavoq.
- Ajoraluartumik sivisoorsuusinnaavoq, kisianni sapinngisamik sukkanerpaamik pissasoq neriuutigaarput.
Sassartitsineq Europami Suliniaqatigiiffimmi Inuit Pisinnaatitaaffii pillugit isumaqatigiissutaani immikkoortunik marlunnik unioqqutitsinermut tunngavoq.
Immikkoortoq 8 – nammineq inuuneqarnerup ilaqutaqarnerullu ataqqineqarnissaanut pisinnaatitaaffik kiisalu immikkoortoq 14 – Immikkoortitsinermut inerteqqut.
- Inuit taakku siullermik ilaquttat inooqatiginissaannut pisinnaatitaaffimminnik unioqqutitsiffigineqarput, tassani naalagaaffik meeqqat angajoqqaaminnut attavimmik pilersitsinissamut inatsisitigut qulakkeerinnittussaavoq. Tassunga atatillugu danskit naalagaaffiata meeqqat immikkoortissimagai isumaqarpugut, Kalaallit Nunaanni inunngornerat pissutigalugu, pisinnaatitaaffiit taakku danskit meerartaannut tunniunneqartareermata.
Suliat taama ittut aningaasatigut nalilerneqarsinnaanngillat
Eqqartuussissuserisut inuit 26-t maannamut sinniisuuffigaat, kisianni ataataqanngitsut arlallit suliaq pillugu oqaloqatiginnipput.
Sassartitsinermi inunnut 26-nut immikkut 125.000 koruuninik taarsiisoqarnissaanik piumasaqartoqarpoq.
- Takku unioqqutitsinerit aamma suminngaanneernerup paasisaqarfiginissaanut periarfissaq aningaasatigut nalilerneqarsinnaanngilaq. Kisianni piumasaqaatit Europami Suliniaqatigiiffimmi Inuit Pisinnaatitaaffii pillugit Eqqartuussivimmi sulianit assingusunit tunngavilerneqarput.
Naalagaaffiup 2014-imi inatsimmik akuerineqartumik pisuussuteqarnini nassuerutigisimagaa, eqqartuussissuserisup Mads Prammingip siornatigut oqaatiginikuuaa, tassani inatsisitigut ataataqanngitsut ataatartik paasisinnaanngorpaat, kiisalu toqusup pigisai pillugit suliaq naammassineqarsimanngippat kingornussisinnaalersinneqarmata.