Inatsit tunngaviusussamut siunnersuut: Qanoq suliarineqassanersoq pillugu apeqqutit suli akineqanngillat
Inatsisartunut ilaasortaq, Mariia Simonsen (IA) Naalakkersuisunut apeqquteqarnikuuvoq inatsit tunngaviusussaq pillugu Isumalioqatigiissitat inatsisissatut siunnersuutaa qanoq suliarineqassanersoq. Maannali qaammat sinnerlugu ingerlareersoq Naalakkersuisut akissutissaat suli takkutinngilaq.
Inatsit tunngaviusussaq pillugu isumalioqatigiissitat isumaliutissiissumminik persuarsiornertalimmik tunniussineranit maanna qaammatit marluk sinnerpai. Mannali tikillugu ilisimaneqanngilaq isumaliutissiissutip suliarineqarnissaa pillugu Naalakkersuisut qanoq pilersaaruteqarnersut.
Agguaanneqassanersoq suliarlu qanoq ingerlaqqissanersoq paaserusunneqarpoq
Isumaliutissiissutip Naalakkersuisunut tunniunneqarnerata kingorna qaammatip missaa qaangiummat Inatsisartunut ilaasortaq Mariia Simonsen (IA) Naalakkersuisunut maajip 24-ani apeqquteqarpoq paaserusullugu qanoq pilersaaruteqartoqarnersoq.
Simonsenip paaserusutaa siulleq tassaavoq isumaliutissiissut inatsisissatullu siunnersuut innuttaasunut agguaanneqassanersoq, taamaassimappallu qaqugu tamanna pilersaarutigineqarnersoq.
Apeqqutaata aappaa tassaavoq isumaliutissiissut qanoq suliarineqarumaarnersoq.
Inatsisartoqarfik uppernarsaavoq: Suli akissuteqartoqanngilaq
§ 37 naapertorlugu apeqquteqartoqaraangat Naalakkersuisunut tunniunneqarneraniit sivisunerpaamik ullut qulit qaangiunnerini Naalakkersuisut akissuteqareertartussaapput. Piffissaq eqqorlugu Naalakkersuisut akinissaminnut periarfissaqanngikkaangamik, akissuteqarallartarput nalunaarutigalugu piffissaliussap iluani akinissamut periarfissaqartoqanngitsoq.
Sermitsiaq.AG-mit Inatsisartut allattoqarfiannut paasiniaavugut matumani apeqqutigineqartunut akissut Inatsisartut nittartagaanut ikkutinngitoorneqarsimanersoq, ilisimatinneqarpugulli Mariia Simonsenip apeqqutaanut akissummik akissutaagallartumilluunniit takkuttoqarsimanngitsoq.
Mariia Simonsen piffissami matumani Belgiami Bruxellesimiittoq, Sermitsiaq.AG-mut oqarpoq angalareerluni angerlamut apuukkuni apeqqutini akineqarsimanngippata malitseqartikkumaarlugit.
Naalakkersuisut siulittaasuat oqaaseqartinniarlugu Sermitsiaq.AG-mit sulissutigaarput.