Inatsit tunngaviusussaq suneqassava? Inatsisartut inersuarmi oqaluuserisussanngorpaat
Inatsit tunngaviusussaq pillugu sulinermut ukiuni kingullerni tallimani aningaasat millionit arlallit atorneqarnikuupput. Missingiummik sulisitat tunniussereernikuupput. Taamaattorli puigorneqarsimavoq missingiut tunniunneqareerpat sulineq qanoq ingerlaqqissanersoq pilersaarusiussallugu. Tamanna IA-p Siumullu Inatsisartuni ilaasortaatitaasa iluarserusuppaat.
Sisamanngorneq 12. oktober inatsit tunngaviusussaq Inatsisartuni oqaluuserineqassaaq.
Naalakkersuisooqatigiit partiivi, Inuit Ataqatigiit aamma Siumut ulloq taanna siunnersuutiminnik assigiinngitsunik tassunga tunngasunik saqqummiussissapput aammalu inatsit tunngaviusussaq pillugu sulinerup ingerlaqqinnissaa pillugu siunnersuumminnik saqqummiussissallutik.
- Inatsisartut isumalioqatigiissitap isumaliutissiissutaa Inatsisartuni suliarineqassanersoq qanorluunniit suliarineqassanersoq isumalioqatigiissitap pilersinneqarnerani ajoraluartumik isummerfiginngilaat.
Tamanna nassuerutigalugu IA-p Inatsisartuni gruppia siunnersuummik saqqummiussivoq (UKA2023 imm. 49) Kalaallit Nunaanni Inatsit Tunngaviusussaq pillugu missingiutip, Inatsit Tunngavisussaq pillugu Isumalioqatigiissitap suliarisaata suliareqqinneqarnissaanik piaartumik Naalakkersuisut qulakkeerinneqqullugit inatsisartut aalajangiiffigisassaattut siunnersuuteqarput.
IA: Ukiunut arlalinnut suliap ingerlanneqarnissaanut aningaasaliisoqarli
Inuit Ataqatigiit siunnersuutertik pillugu tunngavilersuipput Inatsisartut aamma Naalakkersuisut qanimut suleqatigiinnerisigut Inatsit Tunngaviusussaq pillugu Isumalioqatigiissitap isumaliutissiissutaanik sukumiisumik nangitseqqiinissaq pingaaruteqarnerarlugu.
Inuit Ataqatigiit aamma isumaqarput, innuttaasunik, ilinniarfeqarfinnik soqutigisaqaqatigiillu kattuffiinik oqaloqateqarluni ataatsimeeqateqarnerit, innuttaasunut paasissutissiineq ilanngullugu, sulinermi ilanngunneqarnissaat pingaaruteqartoq.
- Kalaallit Nunaanni tunngaviusumik inatsit Kalaallit Nunaata Oqaluttuarisaanerani pingaartuusussaavoq. Taamaammat tamat oqartussaaqataaneranni oqaloqatigiinnernik oqallinninnerlu tunngaveqassaaq. Tamanna tunngavigalugu Inuit Ataqatigiit kissaatigaat Naalakkersuisut aamma Inatsisartut suleqatigiillutik sukumiisumik, peqataatitsilluni ukiunilu arlalinni suliarineqarnissaa qulakkiissagaat, IA-p gruppia siunnersuut pillugu tunngavilersuivoq.
S: Sulineq taasisitsinermik kinguleqassaaq
Siumup Inatsisartuni ilaasortaatitai siunnersuuteqarput immikkut ittumik aningaasaliisoqarneratigut inuiaqatigiit akornanni inatsit tunngaviusoq pillugu oqaloqatigiinneq ingerlanneqassasoq (EM2023 pkt. 74).
- Taamaaliornitsigut innuttaasut Isumaliutissiissut pillugu oqaloqatigiinnermikkut qanoq isummernerat qularnaatsumik ilisimalissagatsigu, Siumup Inatsisartuni ilaasortaatitai tunngavilersuipput.
Taakku isumaqarput, tunngaviusumik inatsisissaq isumalioqatigiissitanit suliarineqarsimasoq innuttaasunit isummersorfigineqareerpat taasisitsinissaq tullinnguutissasoq.
- Suliaq tunngaveqarluartumik peqataatitsilluarnikkullu ingerlanneqarpat, Siumumi qularutiginngilarput innuttaasut amerlanerussuteqarluartut Tunngaviusumik Inatsimmut tunuliaqutsiiumaartut.