Ineqarneq pillugu suliaq: Eqqartuussissuserisoqarfiup ineqarnermut akiliutit aamma ineqarnermut taarsigassarsiat millionikkaat misissorpai
Kommuneqarfik Sermersuumi ineqarneq pillugu suliami inissianik attartornermut akiliutissatut isumaqatigiissutit naalakkersuisoqarfiup apeqquserpai. Kommunip eqqartuussissuserisoqarfimmut isumaqatigiissutit aamma ineqarnermut akiliutit misissortissimallugit innersuussivoq, allagaatinik takunnikkumanermit tamanna atuarneqarsinnaavoq.
Inissiani 400-t missaanniittuni Kommuneqarfik Sermersuumi ineqarneq pillugu suliamut ilaasunut attartortut, kukkusumik ineqarnermut akiliisinnaapput, taakkulu isumaqatigiissutaat immaqa inatsimmik naapertuinngillat.
Ineqarnermut Attaveqaasersuutinullu Naalakkersuisoqarfik taama naliliivoq, taakku kommuni misissuiffigileruttorpaat. Kommunip naalakkersuisoqarfiullu akornanni attaveqaqatigiinnermik allagaatinik takunnikkumanermit paasineqarpoq.
Naalakkersuisoqarfik kommunimut allakkami naalakkersuisoqarfiup tunniuteqqusai tiguneqarsimanngitsut allappoq, kisianni ”Ineqarnermut Attaveqaasersuutinullu Naalakkersuisoqarfik inissiani ineqarnermut attartornermut isumaqatigiissutit ilaanik tigusisimavoq”.
Isumaqatigiissutit tunniunneqartut tunngavigalugit naalakkersuisoqarfik ukioq manna siusinnerusukkut ilaatigut kommunimut ima allappoq:
Inatsimmik naapertuinngitsoq
"Inissianik attartornermut isumaqatigiissutit inissianik attartortitsisarneq pillugu Inatsisartut Namminersorlutik Oqartussat kommunillu attartortittagaanni kapitali 3-7 aamma 9-11-imi nalunaarummiittut malinneqarnerinik uppernarsaatinik peqanngilaq.”
”Ineqarnermut akiliutip naatsorsorneqarnerani aamma aaqqinneqarnerani allalu ilanngullugit,” naalakkersuisoqarfik kommunimut allappoq.
Atukkat allat kommunip oqaatigisai, ilaatigut ineqartut oqartussaaqataanerannut, attartorneqartup aserfallattaaliorneqarnissaanut, iluarsaanneqarnissaanut kiisalu attartornerup taamaatinneqarnissaanut tunngapput.
Naalakkersuisoqarfiup taamaattumik inissianik attartornermut isumaqatigiissutit ineqarneq pillugu suliamut ilaasut tamarmik Kommuneqarfik Sermersuup kukkunersiussagai qinnuiginnippoq.
Eqqartuussissuserisoqarfik suliaqartoq
Attartornermut isumaqatigiissutit inatsimmik naapertuinersut paasiniarlugu, kommunip eqqartuussissuserisoqarfik Malling & Hansen Damm suliaqartillugu akissummi allappaa.
Tassami isumaqatigiissutit tamarmik misissorneqassasut kommunalbestyrelsip februaarimi akueraa.
Kommunip inissiani immikkoortortaqarfimmi ineqartut arlaleriarlutik maalaaruteqareersullu, ineqarnermut akiliutip appartinnerata kinguninngua pivoq.
Kommunip akiliut arlaleriarluni illersoreeraalu, inissiani taakkunani ineqarnermut akiliut 15-nit 20 procentinut appartinneqarpoq.
Eqqartuussissuserisoqarfiup misissuineq septembarip naanerani naammassissagaa kommunip naatsorsuutigaa. Eqqartuussissuserisoqarfiup inuussutissarsiortunut attartortitsinermut isumaqatigiissutit kommunip sanaartortunut isumaqatigiissutigisimasaat misissussavaat.