Ineqarneq pillugu suliaq: Kommunimi taarsigassarsiat unioqqutitsinertut nalilerneqarput – Namminersorlutik Oqartussat aamma isornartorsiorneqarput
Naalakkersuisoqarfik naapertorlugu Kommuneqarfik Sermersuup ineqarnermut suliamik taaneqartumi taarsigassarsiani arlalinni aningaasaliissuteqarfiusuni suliat iluamik suliarisimanngilai. Taarsigassarsiat arlallit inatsimmik tunngaveqanngillat, naalakkersuisoqarfik inerniliivoq, tassanilu aamma Namminersorlutik Oqartussat inissiani taakkunani taarsigassarsiaanut tunngaviusoq apeqquserpaat.
Kommuneqarfik Sermersuumi ineqarnermik suliami Ineqarnermut Attaveqaasersuutinullu Naalakkersuisoqarfik kommunimi misissuinermik aallartitsivoq.
Naalakkersuisoqarfiup taarsigassarsiat 131 mio. kr.-t missaanniittut, Nuummi inissianik 400-t missaanniittunik sanaartortunut Kommuneqarfik Sermersuup aningaasaliissutigisai sammivai. Kommunip tamatuma kingorna inissiat attartorpai, illoqarfiullu pingaarnersaanni sulisunut innuttaasunullu inissarsinissamut allattorsimaffinniittunut attartorteqqillugit.
Taarsigassarsiat arlallit inatsimmi tunngaveqanngitsumik taarsigassarsiunneqarsimasut, naalakkersuisoqarfik inerniliivoq. Naalakkersuisoqarfiup kommunillu akornanni attaveqaqatigiinnerup, Sermitsiaq.AG-p allagaatinik takunnikkumanermini pissarsiaasa tamanna takutippaa.
Attartornermut akiliut inatsimmik tunngaveqarpa?
Illoqarfiit pingaarnersaanni kommunip inissianik amerlanerusunik pissarsiniarluni periusaa novembarimi 2021-mi Kommunit Nakkutilliisoqarfiannit nalilerneqarpoq, Kommunit Nakkutilliisoqarfiatalu aalajangiinerata saniatigut naalakkersuisoqarfik pisortat taarsigassarsiarititaannik kommunip aningaasaliissutaannik misissuilluni aallartippoq.
Taarsigassarsiat tunngaviusumik sanatitsinerup akiata 20 procentianik naleqartarpoq, piffissamilu aalajangersimasumi erniaqartinneqarnani akilersuinertaqartanngilaq.
Ataatsimut isigalugu kommunip attartornermut akiliut kommunip inuussutissarsiornermi attartornermut isumaqatigiissutini, sanaartortunut isumaqatigiissutigisamini inatsimmi piumasaqaatinik tunngaveqarnerannik uppernarsaasiorsimannginnera, naalakkersuisoqarfimmit inerniliunneqarpoq.
Kommunillu inimik attartornermut akiliutip annertussusaata inatsimmik tunngaveqarnersoq uppernarsarsinnaanngippagu, taarsigassarsiat taakku akilerneqarnissaannik kinguneqarsinnaavoq, eqqunngitsumik tunngavilimmik aningaasaliissutaanikuummata, imaluunniit kommuni sanaartortumik namminersortumik arlalinnilluunniit ineqarnermut akiliutip apparneqarnissaanut isumaqatiginninniartariaqarpoq.
Pisumi ataatsimi inissiat attartortitani najugaqatigiiffimmut illersukkamut sulisuinullu 25-nut atorpai, tamannalu inatsimmik tunngaveqanngilluinnarpoq, naalakkersuisoqarfik oqariartuuteqarpoq, taamaattumillu taarsigassarsiat akilerneqartariaqarput imaluunniit inissiatut nalinginnaasutut attartortinneqartariaqaraluarput.
Namminersorlutik Oqartussani aamma ajornartorsiut
Inissianut taarsigassarsiat kommunimit akilerneqarsinnaanissaannut sanaartornermut naatsorsuutinik inatsimmik naammassinnittunik suliaqartoqarsimannginnera, ajornartorsiutit ilaat naalakkersuisoqarfiup kommunimut oqaatigaa.
Naalakkersuisoqarfik uani allattukkani oqaaseqaateqarpoq:
Kommunip sanaartortunit arlalinnit naatsorsuutinik amigartunut tunngatillugu nutaanik tigusaqarsimalluni, juulip naanerani naalakkersuisoqarfimmut nalunaarutigaa. Allakkat kingulliit pissarsiarineqarpata, sanaartornermut naatsorsuutit amigartut taarsigassarsianut sunniuteqassanersut aalajangerneqassaaq.
Kommunili kisimi taamatut ajornartorsiunngilaq. Naalakkersuisoqarfiup aamma Namminersorlutik Oqartussani allaffissornermi taarsigassiinernilu marlunni taamatut ajornartorsiuteqartoqartoq paasivaa.
- Kommuneqarfik Sermersooq aamma Namminersorlutik Oqartussat pisuni arlalinni sanaartornermut naatsorsuutit inissianut aningaasaliinermi taarsigassarsiat annertussusaannik naatsorsornerannut tunngavittut uppernarsakkamik peqarnersoq misissorsimanngikkaat, Ineqarnermut Attaveqaasersuutinullu Naalakkersuisoqarfik ataatsimut naliliivoq, naalakkersuisoqarfik kommunimut allappoq.
Taarsigassarsianut tunngaviusut naatsorsoqqinniaraat
Naalakkersuisoqarfik naapertorlugu Namminersorlutik Oqartussat kukkuneq pissutigalugu inissianut marlunni – Kujallerpaat 10-mut aamma Kissarneqqortuunnguaq 8-mut – katillugit 16 mio. kr.-t pisortanit taarsigassarsiat akilerneqarneri naatsorsoqqinneqassapput.
Kujallerpaat 10-mi taarsigassarsiat 4,2 mio. kr.-t marloriarlugit 2022-mi siusinaarluni akilerneqarsimapput, suliarlu taamaattumik matuneqarpoq.
Kommuni aamma suliamut kiserngoruttumut Kissarneqqortuunnguaq 8-mut tunngasumik nutaamik naatsorsuiniarpoq.
Ataani tabelimi Deloittep 2022-p aallartinnerani ingerlatsivimmi kukkunersiuineranut atatillugu suliaani, naalakkersuisoqarfiup taarsigassarsiat misissugai takutinneqarput.
Namminersorlutik Oqartussat 28 mio. kr.-nik taarsigassarsiaqarpoq.