Ineqarneq pillugu suliaq: Namminersorlutik Oqartussat sakkortuumik isornartorsiuisut – iluarsaanissaq piumasarineqarpoq, professori oqarpoq

Kommuneqarfik Sermersuup taamanikkut inatsisit paatsoorsimavai, Namminersorlutik Oqartussallu aningaasaataasa ilaat pisinnaatitaanani atorsimallugit.

Ineqarnermut Attaveqaasersuutinullu Naalakkersuisoqarfik, pisortanit taarsigassarsiat Kommuneqarfik Sermersuup ineqarneq pillugu suliamik taaneqartumut atatillugu taarsigassiissutigisaannut atatillugu taama isumaqarpoq.

Inatsit malillugu kommuni inissianik sanaartornerup 20 procentiata nalinginut taarsigassarsititsisinnaavoq. Tamatuma saniatigut Namminersorlutik Oqartussat aamma 20 procentinik taarsigassarsititsisinnaallutik.

Sanaartornernili marlunni kommuni Namminersorlutik Oqartussat kommunilu sinnerlugit sanaartornerup nalinganit katillugit 40 procentinik taarsigassarsititsisimavoq, naalakkersuisoqarfiullu tamanna sakkortuumik isornartorsiorpaa.

Taarsigassarsiat marluk pineqarput, Nuummi inissiaqarfinnut marluusunut immikkut 33,76 mio. kr.-it. Kommunip sanaartornerup kingorna inissiat attartorlugit sulisunut imaluunniit innuttaasunut Nuummi utaqqisut allattorsimaffianniittunut attartorteqqippai.

Naalakkersuisoqarfik: Taarsigassarsiat akilerneqartariaqarput

Kommunip ”Attartortumit Piginnittumut” aaqqiissummit iluanaaruteqarnini pissutigalugu, Namminersorlutik Oqartussat aningaasaataannik taarsigassarsititsisinnaalluni, naalakkersuisoqarfimmut nassuiaavoq. Aningaasat Namminersorlutik Oqartussanit pigineqartut, kommnunip sanaartortumut taarsigassiissutai:

”Kommunip piginnaatitaanani aamma naalakkersuisoqarfiup ilisimanngisaanik Namminersorlutik Oqartussat sinnerlugit, namminersortut inissialiornerannut inissanut aningaasaliinermut taarsigassarsititsisimanera aamma isornartoqartippaa,” Sermitsiaq.AG-p allagaatinik takunnikkumaffigisaani naalakkersuisoqarfik Kommuneqarfik Sermersuumut allappoq.

Kommuni illunik piginnittunut attaveqarluni, Namminersorlutik Oqartussat taarsigassarsititsinerit – 33,7 mio. kr.-t missaanniittut – akileqqullugit attaveqartariaqartoq, naalakkersuisoqarfik naliliivoq.

Professori: Tukattuliorneq

Namminersorlutik Oqartussat kommunimut isornartorsiuinerat Aalborg Universitetimi aningaasanik aqutsinermi professorimut, Per Nikolaj Bukhimut saqqummiuppaa.

Kommunimi pisoq ataatsimut ”tukattuliornertut” isigaa, tassani ingerlatsivik torersaaniarsarivoq.

Kommunimit taarsigassarsititsinerit marluk saniatigut ineqarnermut suliamut tunngatillugu taarsigassarsititsinerit arlallit allat pillugit isornartorsiorneqarpoq. Kommunimit pisortanit taarsiassarsititsinerit ukiut arlallit matuma siornatigut akilerneqareeraluartut, kommunip ingerlatsinerminik inatsisinik naapertuinissamut pisussaaffeqarpoq, professori oqarpoq.

Suliami marlunnik taarsigassarsititsiffiusumi kommuni inissisimanerluttoq, taanna naliliivoq:

- Kommunimi ingerlatsinermi piginnaatinneqarnermi taamaallaat aningaasaliisinnaaneq tunngaviuvoq. Namminersorlutik Oqartussat immaqa taarsigassarsititsisussaagaluartorluunniit, kommunip Namminersorlutik Oqartussat apereqqaartussaavaat, Per Nikolaj Bukh oqarpoq.

Misissuineq ”naleqqulluinnartoq”

Kommunip naggataatigut taarsigassarsititsinerit utertinneqarnissaannik piumasaqassanersoq eqqoriarumanngilaa. Inatsisitigut naliliinikkut tamanna aalajangerneqassaaq.

Ingerlatseqatigiiffiup namminersortup taarsigassarsitinneqarnera suliaq ajornartorsiorfiunerulersippaa, pisortanit taarsigassarsititsinerit pitsaanerullutik piffissap ilaani erniaqarnatillu akilersuinertaqanngimmata, taamaattumillu taarsigassarsititsinerit ingerlatseqatigiiffimmut tapiissutitut isigineqarsinnaammata.

- Taamaattumik ingerlatseqatigiiffiup eqqunngitsumik tapiiffigineqarsimasut akilerneqarnissaannik isumaginnittoqarnissaanik Namminersorlutik Oqartussat oqarnerat naleqqulluinnarpoq.

- Taamaaliortoqarsinnaanersoq nalunarpoq, kisianni aningaasat utertinneqarsinnaanersut misissorneqartarnissaa pisariaqarpoq, Per Nikolaj Bukh oqarpoq.