Inersuarmi aaqqiagiinnginneq: Tatiginninninnginnermik taasisitsiniarneq pinngitsoortinneqarpoq
Naalakkersuisut suleqatigiinnermik nutarterinerat illuatungiliuttut naammaginngilluinnarpaat. Taakku isumaqarput Naalakkersuisuni paarlakaattoqarpallaartoq. Taamaammallu Naalakkersuisut tamaasa tatiginninnginnermik taasitsinissamik nittarsaassiffigaat, taannali naalakkersuisooqatigiit pinngitsoortippaat.
Naalakkersuisuni ilaasortat allanngortinneqarnerannut atatillugu paarlaassinissaq nipituuliorfiuvoq, tamanna illuatungiliuttut isumagivaat.
Partiit illuatungiliuttut ataatsimoorlutik isumaqarput, politikkikkut siuttut aqutsineranni annertuallaamik sangujoraartoqartoq aaqqiagiinngitsoqartoqartorlu, taamallu ingerlatsisoqarnera naalakkersuisooqatigiit inuiaqatigiinnut sumiginnaasut.
Atassutip siulittaasua, Aqqalu Jerimiassen illuatungiliuttut sinnerlugit naalakkersiusunut tatiginnikkunnaarnerminnik saqqummiussisuuvoq:
- Demokraatit, Naleraq, Atassutip aammalu Attaviitsup isumaat malillugu Naalakkersuisut
tamarmiusut iliuuserisaat killiffiallu oqariartuutaasumit allaaneroqaaq, kinguneqartariaqarpoq Naalakkersuisoqarnikkut tamanna.
Naalakkersuisooqatigiit angusaqannginneragaasut
Illuatungiliuttut isumaqarput naalakkersuisooqatigiit maanna suleqatigiittut IA aamma Siumut angusaqarfiunngitsoq aammalu siuttut sangujoraarpallaamik ingerlatsisut, naalakkersuisunilu ilaasortat paarlakaannerujussuisa tamanna ersernerigaa.
- Aarleqqutigaarput aaqqissuusseqqinnerit annertoorujussuit naalakkersuisooqatigiit siunniussimasaat oqaasiinnaassasut aamma aarleqqutigaarput Naalakkersuisut nikerarnerujussuisa kingunerisaanik naalakkersuisoqarfinni tamani suliat naqqaniit aarlarteqqinneqaqattaaginnassasut, tamatumalu kingunerisaanik inuiaqatigiit ineriartornissaraluat kigaallassarneqassasoq, tamannalu inuiaqatigiinnut nalaataritinneqartariaqanngikkaluarpoq, taamaammat tatiginninnginnermik taasisitsinissamik siunnersuummik saqqummiussivugut, Aqqalu Jerimiassen Sermitsiaq.AG-mut tunngavilersuivoq.
Pele Broberg (N) Aqqalu Jerimiassen taperserlugu erseqqissaavoq illuatungiliuttut akuerisinnaanngikkaat taamak allanngorartigisumik angusaqarfiunngitsigisumillu naalakkersuisooqatigiit ingerlatsinerat.
- Nalunngilarput ikinnerussuteqarluta, nalunngilarpullu matumani anguniagarput imaaliallaannaq anguninnaanatigu, tassami naalakkersuisooqatigiit amerlanerussuteqarput, taamaattorli pingaartipparput Kalaallit Nunarput patajaatsumik aqunneqartariaqartoq, tamannalu taamaallaat pisinnaavoq politikkikkut allannguinikkut imaluunniit nutaamik Inatsisartunut qinersinikkut, Pele Broberg Sermitsiaq.AG-mut oqarpoq.
Múte: Illuatungiliuttut marlunnik oqalerlutik pipput
Naalakkersuisut siulittaasuata illuatungiliuttut tatiginnikkunnaarnerannut tunngatillugu paatsuunganerarpaa suna anguniarneqarnersoq, taanna isumaqarpoq illuatungiliuttut pissutissaqanngitsumik eqqunngitsumillu aallaavilimmik marlunnik oqalerlutik inuiaqatigiinnut sunniiniarnerigaat.
- Illuatungiliuttut tamanut suaaruteqarnikuupput tatiginninnginnermik taasiffiginnissamaarlutik naalakkersuisuni ilaasortanut aalajangersimasunut, maannalu naalakkersuisut taakku tunuarmata allatut sammivilerlugu tatiginninnginneq ingerlappaat. Maannami tatiginninnginnermik taasisitsiniarneq pivoq naalakkersuisut taakku tatigiunnaarlugit nittarsaassiffiginiakkatik tunuareersullu suli illuatungiliuttut naammagiliinngillat, naalakkersuisut siulittaasuat ilaatigut tunngavilersuivoq, nangillunilu:
- Allatut oqaatigalugu, illuatungiliuttut iliuusiat marlunnik oqalerluni periarnertut nalilerneqartariaqarpoq. Illuatungiliuttut suleqatigerusullugit assavut isaattaraluarpagut, paarlattuanik tatiginninnginnermik nittarsaassipput, taamaattorli taamatut iliornerminni tunngavilersuutaat tusarnaarpagut, Naalakkersuisut siulittaasuat, Múte Bourup Egede (IA) tunngavilersuivoq.
Múte Bourup Egede aamma erseqqissaavoq Naalakkersuisuni ilaasortat allanngoraluarpataluunniit naalakkersuisooqatigiit politikkikkut sulissutaat kinguarsarneqarnavianngitsut, paarlattuanilli suli nukittunerusumik ingerlanneqartussanngortut.