Inerteqqutitaqanngitsumik nittartakkatsigut meeqqat atisaqarpianngitsut takuneqarsinnaasut

Meeqqat nalunnguffasillit, meeqqat assilisittartutut inissisimasut imaluunniit meeqqat tanissimasut nittartakkani inerteqqutitaqanngitsumik pornomut tunngasunik takititassiarineqartarput.

Assit inerteqqutitaqanngitsumik takutinneqarsinnaasut Red Barnetip nalunaarusiaani atuarneqarsinnaavoq.

Naak assit kinguaassiornermut tunngassuteqarsinnaagaluartut assini kinguaassiortoqannginnera pissutigalugu inerteqqutitaqanngitsumik saqqummersinneqarsinnaapput. Red Barnetsili nalunaarusiamini assit taamaattut inerteqqutaalerseqquaat.

- Assit aningaasarsiutaalluarsinnaapput. Meeqqanik atornerluineruvoq inerteqqutitaqanngitsoq, Red Barnetimi meeqqat illersornissaannut siunersuisartoq Gitte Jakobsen oqarpoq.

- Assit takutitassiarineqartartut kanngunarput, taamaammallu pitsaanerusumik iliuuseqarfigineqartariaqarput inerteqqutaalersillugillu, Gitte Jakobsen oqarpoq.

Nittartakkatigut iserfigineqarsinnaasut 400-t missaanniittut assillu 16.000-it missaanniittut Red Barnetimit misissorneqarput, taakunanngalu 7 procentit missaanniittut meeqqat inuusuttullunniit namminneerlutik assitik ikkussarivaat.

Qanoq inatsisiliortoqarnissaa taamaalilluni ajornakusoorsinnaavoq, inuimmi ilaasa meeqqatik assersuutigalugu nalunnguffasillit Facebookiminnut assimik ikkussisut pinngitsuuneri pissutaalluni qanoq inatsisiliortoqarsinnaanera suli nalornissutigineqarpoq.

- Ilaqutariit assiutiminnik ikkussisarnerat pissutaalluni qanoq inatsisiliortoqarsinnaanersoq nalunarallarpoq, kaammattuutigissavarpulli inuit nittartakkatigut assinik ikkussileraangamik eqqarsarluaqqaarlutik ikkussisassasut.

- Assit pinerluttuliortuunngillat, taakkununngaliuku aallartitsisartut paasineqartariaqartut, taamaattumillu qanoq inatsisiliortoqarsinnaanera nalunarallartoq, Gitte Jakobsen oqarpoq.

Red Barnetip ilisimanngilaa meeqqat pornotut assilineqarsimasut qallunaajunersut, aamma meeqqat suminngaannerpiarnersut.

- Ilisimavarpulli assit meerartallit Ruslandiminngaanneernerusartut, Gitte Jakobsen oqarpoq.