Inigisanit anisitaasut inisseeqqittarnerillu

Inuit Ataqatigiit sinnerlugit Inatsisartunut ilaasortaq Olga P. Berthelsen inissianik attartortut anisitaasarneri aammalu inissinneqarallartarneri pillugit paasisaqarnerorusulluni Naalakkersuisut apeqquteqarfigai.

- Maanna piffisami sivitsulersumi, angerlarsimaffeqanngitsut pillugit misissuinerit ingerlanneqarput. Suliap taassumap qanoq ingerlanera paaserusunnarpoq, maannamut inissaaleqisut aammalu anisitaasimasut, misissuinermut ilaatinneqarnersut paaserusunnarmat, Olga P. Berthelsen allappoq.

- Nuup avataani inigisaminnit anisinneqarsimasut, nuummi anisinneqarsimasunit amerlanerujussuupput. Taamaakkaluartorli illusititseqqiiffissanik pilersitsisoqarnissaa pisariaqartinneqanngitsoq oqaatigineqarpoq. Taanna paasisinnaannginnakku itinerusumik nassuiarneqassasoq kissaatigaara.

- 2010-p aammalu 2011-p ingerlanerani, nunatsinni anisitaasimasut 283-siupput. Paaserusunnarpoq inuit ataasiakkaat tassani pineqarnersut, imaluunniit inoqutigiikkuttaajunersut (ilaqutariit). Ilaqutariit tassani pineqarsimassappata, assilissap maanna takutinneqarneranit, nunatsinni annertunerujussuarmik anisitaasimanermik eqqugaasimasut amerlanerusimassammata, Olga P. Berthelsen paragraf 37'ikkut apeqquteqaatini tunngavilersorpaa:

1. Nuup avataani inigisaminnit anisitaasimasut, qanoq sumullu aammalu qanoq atugassaqartinneqarlutik inisseqqinneqarallartarpat?

2. Assersuutigalugu Qeqqata Kommuuniani, 68-t anisitaasimasut inissinneqarallarpat, imaluunniit angerlarsimaffeqanngitsutut inuuneqalerpat? Qaassuitsup Kommuuniani 18-it, Kommuuni Kujallermi 33-t Sermersuullu Kommuuniani 7-t?

3. Sooq-una assersuutigalugu Qeqqata Kommuuniani, anisitaasimasut 68-isut illusisitseqqiffissamik atorfissaqartitsinngitsut? Nuummi 7-t (2011) atorfissaqartitsisut?

4. Angerlarsimaffeqanngitsut pillugit mississuinerit, qanoq ingerlappat aammalu sumut killippat?

5. 2010 aammalu 2011-mi sinerissami, inigisaminnit anisinneqartut katillugit 283-sut, taakkunanit qassit inuit ataasiakkaajuppat? Aammalu qassit inoqutigikkuutaajuppat?

6. Innuttaasut akiliisinnaassuseqaraluartut inuttulli ajornartorsiuteqarnertik peqqutigalugu, inigisaminnit anisitaasartut ikiorserniarneqartarnerat, qanoq isumaginninnikkut malinnaaffigineqartigaa?