Inissiani qimmuteqarsinnaaneq qitsuteqarsinaanerlu inerteqqutaajunnaassaaq
Inatsisartut pisortat inissiani attartortittagaanni qimmiuteqartalernissamik qitsuuteqartalernissamillu siunnersuut ullumi suliarissavaat. Siunnersuut amerlanerussuteqartunit akuersaarneqartussatut isikkoqaroq
Namminersorlutik Oqartussat kommunillu inissiaataanni attartortittakkani uumasuuteqarsinnaaneq aappaagu januaarip aallaqqaataani inerteqqutaajunnaassaaq.
Naalakkersuisut inatsisissatut siunnersutaanni taamatut allassimasoqarpoq. Siunnersuut amerlanerussuteqartunit akuersaarneqartussatut isikkoqarpoq.
Qimmit qitsuillu saniasitut timmissat kikkaasartullu aamma saaniluit assigisaallu uumasuutigineqarsinnaanngussapput.
Ineqarfinnili ataasiakkaanni uumasuuteqartoqannginnissaa najugaqartut aalajangiiffigisinnaassavaat.
- Attartortunik qimmiuteqarnissamik imaluunniit qitsuuteqarnissamik kissaateqartoqartoq kiisalu attartortut ilaasa tamatuma akuerisaanissaa kissaatiginngikkaat, Naalakkersuisut eqqumaffigaat. Kissaatigineqartut imminnut akerleriittut taakkua naammassiniarlugit, taamaakkaluartoq najugaqatigiiffimmi pineqartumi uumasuuteqarnissaq akuerisaassanngitsoq, siunnersuut malillugu siulersuisut aalajangiinissamut piginnaatinneqarput, Naalakkersuisut saqqummiussissumminni allapput.
- Tamatumani sapigaqartut allallu tamatuma akuerisaannginnissaanik kissaateqartut pisortat inissiaataanni attartortittakkami najugaqaannarnissamut periarfissaqarnissaat, qulakkeerniarneqarpoq. Attartortut najugaqatigiiffimmi ineqarfigisaminni uumasuuteqarnissaq akuerisaassanersoq, najugaqartut oqartussaaqatigiinnerat aqqutigalugu taamaalillutik sunniuteqarsinnaapput.
Qimmiuteqarniaraannili imaluunniit qitsuuteqarniaraanni qularnaveeqqusiussassaq qaammatini pingasuni ineqarnermut akiliutip annertoqqataa akilerneqassaaq.