Inissianik pissarsinissamut periarfissat pitsaanerusut
Innuttaasut nammineq inissianik pisinissaannut periarfissanik pitsaanerusunik Naalakkersuisut sulissuteqarput
Nammineq inissiamik pissarsinissamik periarfissat pitsaanerulersinnerisigut inissianik amigaateqarneq akiorneqassaaq. Mikivsuk Thomassenip (IA) paragraf 37 naapertorlugu apeqquteqaataanut akissummi tamanna atuarneqarsinnaavoq.
Inissaaleqinerup akiorneqarnissaanut Naalakkersuisut ataatsimoortumik periusissiaqarnersut taassuma apeqqutigaa.
- Naalakkersuisut ineqarnermik aaqqissuusseqqinnermik annertunerusumik suliaqarput. Ineqarnermik aqqissuusseqqinnermi innuttaasut inissianik imminnut pilersornissaat ajornannginnerulersinneqassaaq, kiisalu innuttaasut pisortat inissiaataannik attartortittakkanik pisariaqartitsisut inissianik attartortittakkanik atuisinnaanerat ingerlaannassaaq, naalakkersuisoq Simon Simonsen (S) taama akissuteqarpoq.
Tamanna anguniarlugu piginneqatigiilluni inissiat pillugit kiisalu illunik aningaasaliinissamut inatsimmik siorna ukiakkut akuersissuteqaartoqarpoq. Naalakkersuisut 2018-imi ukiakkut ataatsimiinnissamut illunut sanaqataaffiusunut taarsigassarsisarneq pillugu Inatsisartut inatsisissaannut siunnersuummut saqqummiussipput. Aamma ineqarnermik aaqqissuusseqqinnissamut atatillugu attartortitsisarneq pillugu inatsimmik nutaamik suliaqartoqassaaq.
- Ineqarnermik aaqqissuusseqqinnermi piginneqatigiilluni inissianik aamma inissianut aningaasalersuisarnermi taarsigassarsilluni inissianik sanaartornissamut periarfissat pitsaanerulissapput. Tamatumani pingaartumik illoqarfiit najugaqarfiillu minnerit pineqarput, taakkununnga illoqarfinnut annerusunut sanilliullugu amerlanerusunik taarsigassarsisoqarsinnaalerluni. Tamatuma saniatigut illunut sanaqataaffiusunut taarsigassarsititsisarneq pillugu inatsisissatut siunnersuut innuttaasut inissianik imminnut pilersorsinnaanissaannut periarfissanik pitsaaneru lersitsissaaq.