Inissiat 37-it kiassanermut ajornartorsiuteqartut: Ilaqutariit pingasut SØMAmut inissikkallarneqartut
Sisimiuni ataataasup ilaquttani qiiannginniassammata grillerivik atorlugu kiassartariaqarsimavoq. Ilaqutariit SØMAmut inissikkallarneqarput.
Ataataasup angerlarsimaffitsik kialaartinniarlugu nalinginnaasuunngitsumik iliuuseqartariaqalersimavoq. Taassumami inissiaminni Tuapannguani Sisimiuniittumi grillerivik silami atortagaq atorlugu ilaquttani qiiannginniassammata kiassarsimavoq. Maanna taakkua ilaqutariillu allat marluk SØMAmut kialaarnerusumut inissikkallarneqartut, INI A/S Sermitsiaq AG-mut paasissutissiivoq:
- Ilaqutariit pingasut SØMA-mut, ataatsillu hotellimut nuutsinneqarallarput. Inissiani kiassarnermut aaqqiissut suli iluarsineqarsimanngimmat nuutsinneqarallarput.
INI A/S-ip erseqqissarpaa inissiat 37-t kiassarneqannginnerat pineqarani, kiassarnermilli ajornartorsiuteqarnerat pineqarmat.
- Inuit ilaat annikitsumik eqqorneqaramik suli inissiaminni najugaqarput, INI A/S nalunaarpoq.
Kissaqqingajalersut
INI A/S Brøndum suleqatigalugu kiassarnermut naleqqussarsinnaasunik ventililiorniarlutik aallartissimasut pingasunngornermi ilisimatitsivoq.
Tuapannguanut 16-imi inissiat aqqanillit sisamanngornermi kiassarnermut atortorissaarusersorneqassapput.
Inissiaatileqatigiiffiup Brøndum suleqatigalugu ajornartorsiut aaqqinniarsaraa, neriuutigalugulu ajornartorsiut piaarnerpaamik aaqqinneqarumaartoq.