Inissiat 37-it kiassarneqanngitsut: Ataataasoq grillerivik atorlugu kiassartariaqalersoq

Issileruttornerani Sisimiuni ilaqutariippassuit inissiaminni kiassarniarnermut ajornartorsiutinik nalaataqarput. Ataataasormi ilaquttani kialaartumi angerlarsimaffeqartinniarlugit nalinginnaanngitsumik kiassarnissamut iliuuseqartariaqalerpoq. Ilaquttani qiiannginniassammata silami grillerivik atortagaq angerlarsimaffimminut eqquttariaqalersimavaa, kiisalu gassimik kiassaat silami unnuinermi atorneqartartoq aamma atortariaqalerlugu.

- Ajoq. Inerput tallimaannarnik kiappoq. Kiassarniarluta grillerivik silamiittoq eqquttariaqalersimavarput, Sisimiuni Tuapannguani najugalik Anguak Lennert marlunnut nukangasunut ataataasoq oqaluttuarpoq.

Ulluni qulini kiassarneqanngitsut

Sisimiuni innuttaasoq alla aamma oqaluttuarpoq ulluni qulini inigisartik kiassarneqarani nillertuinnaasoq. INI A/S-i ajornartorsiummut aaqqiinissaa neriuutigalugu Atuisartoqarnermut Unammilleqatigiinnermullu Aqutsisoqarfimmut naammagittaalliorluni allagaqarsimavoq.

Anguak Lennertikkut sapaatip akunnerata siulianili sisamanngormat INI A/S-mut saaffiginnittarsimagaluarpoq. Ajornartorsiut aaqqinniarlugu takkuttoqartarsimagaluarpoq, taamaakaluartoq suli angerlarsimaffiat nillertuinnaavoq. Kammalaatiminiillu kiassaammik gassitortumik, silami unnuinermi atorneqartartumik attartorsimavoq.

- Unnuaq innaratta kialaarpoq, kisianni iteratta nillertuinnaavoq. Gassi unnuaq tamaat ikumatissinnaasimanngilarput.

Taassuma ilanngullugu oqaatigaa arlaleriarluni inissiaatileqatigiiffimmut INI A/S-mut pigaartumut pinartumik saaffiginnittarsimagaluarluni. Piumaffigineqartarporli aqaguani saaffiginnissasoq. Inissiaatileqatigiiffiup ajornartorsiut aaqqissinnaanngippagu Anguak Lennertip tupigaa kialaarnerusumut neqeruulaarsimanngimmata.

- Tupigaara kialaanerusumulluunniit utaqqiisaa neqeroorfigitinnginnatta.

INI A/S ajornartorsiut aaqqinniarlugu sulissuteqarpoq

INI A/S naapertorlugu inissiani Tuapannguani 15, 16, 17-milu kiassarnermut ajornartorsiuteqartut ilisimatinneqarsimapput. Inissiat katillugit 37-it kiassanermut ajornartorsiuteqarput:

- Inissiat pingasut pumpimik kaaviaartitsisumik ikkussuiffigineqarsimapput iluatsilluartumik. Kisianni inissiat allat suli kiassarnermut ajornartorsiuteqarput. Ajornartorsiummut pissutaavoq imermik kissartumik pilersuinerup ingerlalluannginnera. Taamaattumik INI maanna kissartunik pilersuisunik kiassaataalluarsinnaasunik ikkussuivoq.

- Inissiat aqqanillit Tuapannguit 16-miittut ullumi ikkussuiffigineqassapput, naammaginartumik kiassarnissaat anguniarlugu, INI A/S oqarpoq nangillunilu:

- INI ajornartorsiummut aaqqiiniarluni Brøndum suleqatigalugu tamaviaarpoq. Neriuutigaarput ajornartorsiut piaartumik aaqqissasoq. Ajornartorsiut aaqqinneqarpat inissiani attartortut nalunaarfigineqarumaarput.