Inissiat: Inissiat 76-it piffissami killiligaanngitsumi inoqanngitsut

TV-eqarfik Nanoq Media maajip 15-iani 2013-imi nutaarsiassamik ilanngussaqarpoq qulequtalimmik »Millionærbarakkimik isaterinissaq«.

Ilanngutassiami taamani Ineqarnermut Attaveqaasersuutinullu Naalakkersuisoqarfiup pisortaa Olafur P. Nielsen oqaluttuarpoq, inissiarsuit pisoqalisimasut sisamat, 1957-imit 1964-imut sanaartorneqarsimasut, isaterneqassasut: Kongevejimi Millionærbarakki, etagehusi aappaluttoq aamma tungujortoq kiisalu Aqqusinersuarmi etagehusitoqaq aappaluttoq.

Ilanngutassiami Olafur P. Nielsenip inissiarsuarnik nutaanik titartakkat kusanartut, pilersaarutit malillugit inissiarsuarnut pisoqalisimasunut sisamanut 2015-imi taartaasussat, aamma takutippai.

Pilersaarutit taamaatiinnarneqarpoq, kingusinnerusukkullu Kommuneqarfik Sermersooq Qimerluanut kommunimi pilersaarummut tapiliussamik akuersissutiginnippoq, taamaalillunilu Kongevejimi sumiiffik Namminersorlutik Oqartussat ilinniartunut inissianik nalinginnaasunik sanaartorneranni immikkoortut aappaannut atugassiissutigineqarluni.

Milliornærbarakkimi kiisalu etagehusini aappaluttumi tungujortumilu inissiat 76-it inuerutsinneqarsimapput, tamatumalu kingorna isaterineq aallartissinnaanngorluni.

Naalakkersuisulli juunimi aalajangerput suliariumannittussarsiuussineq taamaatiinnarneqassasoq sanasut suliffeqarfiata neqeroorutaanik naammaginninnginneq pissutigalugu, taamaattumillu Nuummi ilinniartut ineqarfiinik sanaartornerup immikkoortuata aappaa, Ineqarnermut Attaveqaasersuutinullu Naalakkersuisoq Erik Jensen naapertorlugu, ukiunik marlunniit pingasunut kinguartinneqarluni.

Tamanna aamma isaterinissap piffissami killiligaanngitsumi kinguartinneqarnissaanik isumaqarpoq.

Taamaalineratalu nalaani inissiarsuarni pingasuni inissiat 76-it inoqanngillat igalaavilu matoorneqarsimallutik – illoqarfimmi inissianut attartortittakkanut nalinginnaasunut utaqqisut allattorsimaffianni utaqqisut amerliartupiloorfigisaanni.

Sermitsiaq - 04/08-2023

Klik her for at læse