Inissiat: Kiisami ineqarnermut aaqqissuusseqqinnissaq aallartilersoq

Ineqarnermi pissutsit pitsaanngitsut qanoq ililluni pitsaasunngortinneqarnissaanut isumaqatigiissut imaqassasoq, ineqarnermut naalakkersuisoq oqarpoq.

Hans Peter Poulsen (S), ineqarnermut attaveqaatinullu naalakkersuisup pisortat inissianik piginnittuunerata sapinngisamik annertunerpaamik annikillisarneqarnissaa, innuttaasullu namminneerlutik inissianik imminnut pilersornerisa sulissutigineqarnissaa erseqqissaatigaa.

Leiff Josefsen

Julia Aka Wille

arfininng 09. dec 2023 06:14

Annonse

Ineqarnermut aaqqissuusseqqinnissaq sivisuumik utaqqineqarsimasoq arlaleriarluni kinguartinneqartarpoq, kiisamili aaqqissuusseqqinnissaq pilivissutut maanna isikkoqarpoq. Partiinik isumaqatiginninniarnerit ingerlanneqartut, Hans Peter Poulsen (S) ineqarnermut attaveqarnermullu naalakkersuisoq, qanittumi partiinik isumaqatigiissutissamut toqqammavimmik naammassinninnissamik ilimasuttoq oqarpoq.

Aaqqissuisuuneq innersuussivoq

Allaaserisaq una aviisimit Sermitsiamit tigusaavoq, aaqqissuisuunermit Dorthe Olsenimit toqqarneqarluni.

Taamaalillutit nittartakkami atuartartutut aviisimi allaaserisamik, nalinginnaasumik aningaasanik akeqartartumik atuarsinnaallutit. Neriuppugut allaaserisaq aviisit allaanerunerannik aamma tusagassiutini akeqanngitsuni issuakkatut nutaarsiassaannaannginnerannik takutitsiumaartoq. Aviisit pitsaassusaat annertooq itisiliinernit aamma tunuliaqutinik aamma minnerunngitsumik inuit pillugit allaaserilluakkanik pissuteqarput.

Neriuppugut misiliummik pisartagaqalernissannut isumassarsiorfigisinnaagit, taamaalillutik inuiaqatigiit ineriartornerannut malinnaalluarsinnaanerussagavit.

Aviisimut neqeroorummik pissarsigit – 38 39 40 sianerfigiuk imaluunniit mail adm@sermitsiaq.gl allaffigalugu

- Isumaqatigiissuteqarnissatsinnut ullualuinnaat amigaataalerput. Kalaallit Nunatsinni ineqarnermi unammilligassatta aaqqinnissaanut aningaasat milliuunilippassuit atortussaavagut, tassanilu iluarsaassinissamik kinguussaanerup annertusiartuinnavissup unitsinnissaata pisariaqarnera, peqatigisaanillu inissiaatitta pioreersut ajornerulinnginnissaat aallaavigissavarput, naalakkersuisoq oqarpoq.

Isumaqatigiissummi aaqqissuusseqqinnissamilu unammilligassat aaqqiissutissallu iliuuseqarfigineqassapput, Hans Peter Poulsen oqarpoq. Inissiat amerlanerusut pisariaqartinneqarput, peqatigisaanillu namminersorlutik oqartussani iluarsartuussinissamik milliard koruunit angullugit naleqartumik kinguussaasoqarpoq. Nunarput tamakkerlugu namminersorlutik oqartussat inissiaataat 6000-usunit amerlasuut aserfallassimapput, namminersorlutillu oqartussat immikkoortumut pilersaarutaat 2016-meersoq naapertorlugu, inissianit attartortittakkanit 6000-nit 217-iinnaat inigineqarsinnaanerminnut naleqqupput.

- Inissiat arlallit najugaqarfigissallugit peqqinnanngillat, ajornartorsiullu tamanna iliuuseqarfigisariaqarparput, maannakkutummi inissisimaannarsinnaanngilagut. Kalaallit Nunarput ineriartussappat ineqarnermi pissutsit aaqqiiviginissaat pingaaruteqarpoq, Hans Peter Poulsen oqarpoq.

Unammilligassat annertuut utaqqipput

Ineqarnermi pissutsit ulluimikkut aaqqinneqarsinnaanngillat. Ineqarnermik aaqqissuusseqqinneq minnerpaamik ukiuni tullerni 15-ni atuutissaaq, aaqqissugassallu iliuuseqarfiginissaannut aningaasaliissutissat nanineqartariaqarput. Inissianik peqqinnartunik piujuartitsisunillu, siunissamut isumannaakkanik pilersitsinissaq anguniakkani pingaarnersaavoq, Hans Peter Poulsen oqarpoq.

Pissutsilli killup tungaanut saatinneqassappata namminersorlutik oqartussat ilungersunartunik suliassaqartoq naalakkersuisup nassuerutigaa.

- Pissutsit ukiorpassuarni pitsaanngitsumik ingerlasimanerata unitsinnissaannut annertoorujussuarnik suliassaqarpugut. Killup tungaanut saatsissagutsigit immikkut ittumik suliniuteqartoqartariaqarpoq, matumanilu suliniutit pissutsit ajortumik inissisimanerannik unitsitsisussat, kingornalu ineriartornermik suliniutinik nassaarfiusussat ingerlanneqartariaqarput, tamannalu ukiuni arlalinni pissaaq.

Ineqarnermut pilersaarutini anguniagaqarluarfiusut peqatigisaanik ilinniartitaanermut suliniutit, kalaallit namminneq sanaatulernerannik qularnaarisussat aallartinneqassapput.

- Naammassinnissinnaassuseq, inuillu amerlanerit ilinniartinnissaanni suliassat suut ingerlanneqassanersut aallaaviussapput. Sulisoqarnermi suliffeqarnermilu maanna inissisimanerput qissimittariaqarparput, tassanilu sanasut naammattut pigineqannginnerat ilisimaarivarput. Pissutsit ataqatigiittariaqarput, taamaattoqanngippammi inuit sivikitsumik nunatsinnukarsinnarlutik aallaqqittarnerat pinngitsoorsinnaassanngilarput.

Periusissiat qanittumi saqqummiunneqassasut

Minnerunngitsumik inissiat naammanngitsumik aningaasalersorneqarnerisa kingunerisaanik iluarsartuussinissamik aserfallatsaaliuinissamillu annertuumik kinguussaaneq pissutigalugu, pisortat inissiaataat attartortittakkat pitsaanngillat. Tamanna Attassinissamik siuariartornissamillu pilersaarut 2-mi qanittumi saqqummeqqammisumi, pisortat inissianik pilersuinermi akuunerannik annikillisaasussamik, innuttaasullu pisisinnaassusianik annertusaanissamik tikkuussisumi atuarneqarsinnaavoq.

- Ineqarnermut immikkoortumi pitsaanngitsumik ineriartornerup unitsinnissaanik, taamaalilluni innuttaasut tamarmik ineqarnissamut periarfissaqalerlutillu pisortat annikinnerpaamik akuunissaannik aallaaveqartoq isumaqatigiissutissap ilungersornartorissavaa. Tamannali piffissartornassaaq, eqqarsariartaasermi taamaattoq ukiorpassuarni atorsimanngilarput.

- Pisortat ingerlatseqatigiiffiillu namminneq sulisuminnut inissianik sanaartortarnerat eqqarsartaaserisimavarput, tamannali ungasinnerusoq isigalugu inuiaqatigiinnut peqqinnartuusimanngitsoq paasinarsivoq.

Aappaagu piaartumik ineqarnermut aaqqissuusseqqinnermi inatsisinik allannguinermik suliassat aallartinneqassapput, 2025-llu tungaanut inatsisinut tunngasut tamarmik naammassineqarsimassapput, peqatigisaanillu tamatuma qularnaarnissaanut periusissiortoqassaaq, Hans Peter Poulsen paasissutissiivoq.

Takorluukkat pilersaarutillu annertuumik anguniagaqartut taakkartorpatit. Ineqarnermut immikkoortumi sulissussaaleqinermilu unammilligassat annertoorsuit ukiut 15-iinnaat ingerlaneranni aaqqinneqarsinnaanerat piviusorsiorpa?

- Nunannguatsinni unammilligassarpassuaqarpoq, pilersaaruterpullu annertoorujussuarmik anguniagassiivoq, naammassisinnaanerali upperaarput. Suliniutit allat aamma qularnaarneqartussaapput, tassani sanasunut tunngatillugu ilinniartitaanermi immikkoortoq ilanngullugu. Tassanilu ”nammineq naammassisinnaavarput” oqarsinnaanngornissarput nassaarissavarput, naalakkersuisoq oqarpoq.