Innarlerneqarnissamut nalaataqarnerlunnissamullu illersuut: Meeqqat Dronning Ingridip Napparsimmavissuani lattergassimik atuitinneqartarput
Dronning Ingridip Napparsimmavissuani ukiumi ataasinngulersumi meeqqat anniarnissaat annikillisinniarlugu lattergassi aamma takorluuititsilluni angalatitsinerit neqeroorutigineqartarput – tamannalu iluatsilluarpoq.
Lattergassi aamma takorluuititsilluni angalatitsinerit.
Dronning Ingridip Napparsimmavissua meeqqanut sullulinnik ikkussivigisassanut, imaluunniit tamatuminnga taarsiiffigisassanik, aaversittussanik imaluunniit kiluersittussanut taakku neqeroorutigisarpaat.
Taanna sinitsinneqarnermut taartaavoq, ukiumilu ataasinngulersumi pitsaasunik angusaqarfiusoq.
Peqqissutsimut Naalakkersuisoqarfik taama nalunaaruteqarpoq.
Innarlerneqarnissaannik nalaataqarnerlunnissaannillu pinaveersaartitsineq
Ukiuni arlalinni annernarsinnaasunik katsorsaanerit, pitsaasumik suliarinninnerit meeqqat suleqatigilluarnissaannik pisariaqartitsineranik periuseqarluni annertuumik ukkatarineqarsimasut, tassani atuarneqarsinnaavoq.
Meeqqat aalajangerlugit noqinneqartussaanngillat. Naalakkersuisoqarfik naapertorlugu tamanna anguniagaavoq, taamaalillutik innarlerneqassanngillat aamma qaangeruminaatsitaminnik nalaataqassanngillat.
- Meeqqanut inuusuttunullu ass. aaversinnissamut, tarajulersuuserneqarnissamut assigisaannulluunniit tunngatillugu immikkut ajornartorsiuteqartunut lattergassi neqeroorutigaarput, Dronning Ingridip Napparsimmavissuani peqqissaasoq sinitsitsisartoq Line Glistrup oqarpoq.
Taassuma sulisunit angajoqaaniillu aalaakkerneqarnerup, meeqqanut qanoq tarnikkut ajoqusiitigisinnaanera nassuiarpaa. Taamaammat nakorsartinnerni annernarsinnaasartuni nalinginnaasumik meeqqat sinitsinneqartarsimapput, lattergassili atorlugu meeraq attavigineqaannarsinnaavoq.
Oqaluttuaq quianartoq
Napparsimmavissuarmi peruluttunut immikkoortortami pilattaavimmilu peqqissaasut sinitsitsisartut atorfeqavissut tamarmik lattergassi meeqqanillu annernartoq puigorlugu takorluuisitsineq ilinniarsimavaat – naalakkersuisoqarfillu naapertorlugu meeqqat sullinneqarnerini anniannginniassammata takorluuisitsilluni angalaartinneqartarput.
Takorluuisitsinerit meeqqap silarsuaanit oqaluttuat tigulaagaasartut, Line Glistrup nassuiaavoq:
- Oqaluttuat illarnartunngortinniartarpagut.
Meeqqap sulisunik suleqateqarnermigut anniarisaq annikillisittarpaa, sulinermilu takorluuisitsineq qitiusoq taassuma erseqqissarpaa.